Katherine Routledge
Katherine Maria Routledge (gebore Pease; 11 Augustus 1866 – 13 Desember 1935), was ’n Britse argeoloog en antropoloog wat in 1914 die eerste ware opname van Paaseiland gedoen, maar nie voltooi het nie.
Ná die Anglo-Boereoorlog het sy saam met ’n komitee na Suid-Afrika gereis om ondersoek in te stel na die hervestiging van ongetroude werkende vroue van Engeland in Suid-Afrika. In 1906 is sy met William Scoresby Routledge getroud. Die egpaar het in 1910 tussen die Kikuyu van die destydse Brits-Oos-Afrika gaan bly en saam ’n boek oor hul navorsing gepubliseer met die titel With A Prehistoric People.
Paaseiland
In 1910 het die Routledges besluit om hul eie ekspedisie na Paaseiland te reël. Hulle het op 29 Maart 1914 met die skoener Mana by Paaseiland gearriveer. Hulle het ’n basiskamp by Mataveri en by Rano Raraku gehad en ook Orongo en Anakena verken. Met die hulp van ’n eilandbewoner met die naam Juan Tepano het Routledge die plaaslike bevolking ondervra en ’n katalogus opgestel van die moai (reusestandbeelde) en ahu (steenplatforms waarop hulle staan). Hulle het meer as 30 moai uitgegrawe, die stamoudstes in hul kolonie vir melaatses noord van Hanga Roa besoek en verskeie legendes en oorlewerings neergeskryf, onder meer dié van Hotu Matu'a, die voëlmankultus, clan-name en die rongorongo-skrif.
Die egpaar het die eiland in Augustus 1915 verlaat en teruggekeer huis toe. Sy het in 1919 haar bevindings gepubliseer in die gewilde reisboek The Mystery of Easter Island. Honderde van die voorwerpe wat sy en haar man ontdek het, is nou in die Pitt Rivers-museum in Oxford[1] en die Britse Museum in Londen.[2]
Gesondheid
Routledge het na berig word aan paranoïede skisofrenie gely. Ná 1925 het dit vererger – sy het Scoresby uit haar huis in Hyde Park geskop en haarself binne-in toegesluit. In 1929 het Scoresby en haar familie haar in ’n psigiatriese hospitaal laat opneem. Sy is in 1935 daar dood.
Verwysings
- ↑ "Pitt Rivers Museum Collection". Geargiveer vanaf die oorspronklike op 13 November 2014. Besoek op 19 Julie 2016.
- ↑ British Museum Collection
Verdere leesstof
- Katherine Routledge (1919). The Mystery of Easter Island: The Story of an Expedition, van Internet Archive.
- Katherine Routledge: The Mystery of Easter Island: New York: Cosmo Classics: 2005: ISBN 1-59605-588-X (Reprint)
- Van Tilburg, Jo Anne (2003). Among Stone Giants: The Life of Katherine Routledge and Her Remarkable Expedition to Easter Island. New York: Scribner. ISBN 0-7432-4480-X.
{{cite book}}: Ongeldige|ref=harv(hulp)
Eksterne skakels
Wikimedia Commons het meer media in die kategorie Katherine Routledge.
Hierdie artikel is vertaal uit die Engelse Wikipedia
