Equus caballus

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

«Caballo» reendreza ta iste articlo. Ta os diferents usos d'a palabra «caballo» se veiga Caballo (desambigación).

Equus ferus caballus
Caballo
Denominacions populars
Caballo
Estau de conservación
Seguro (IUCN)
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Mammalia
Orden:	Perissodactyla
Familia:	Equidae
Chenero:	Equus
Especie:	Equus ferus
Subespecie:	Equus ferus caballus
Descripción
Equus caballus L., 1753

O caballo (d'o latín <CABALLUS;^[1] cientificament Equus ferus caballus^[2] (L., 1753)) ye un mamifero perisodactilo domestico d'a familia d'os equidos, d'alimentación herbivora y amplament distribuito en o mundo. Concretament, se considera una subespecie domesticada d'o tarpán,^[2] un caballo salvache d'Eurasia actualment extinguito.

Lo ser humano ha utilizau a lo caballo dende la prehistoria pa lo suyo aproveitamiento en prencipio pa consumo, y posteriorment con la domesticación d'estes pa labors de tiro, arrociegue y transporte tanto de materials como de personas.

En la actualidat tamién son utilizaus pa competicions esportivas, ye de suposar que existioron competicions dende l'antiguidat pero la utilización d'os caballos pa esporte ye relativament recient. Los esportes en os cuals s'utilizan caballos son conoixius como esportes eqüestres d'os cuals existen multiples variants aprofitando las habilidaz d'as diferents razas.

O caballo ye un herbivoro de grans dimensions, de dica 1.000 kg de peso y 1,90 metros d'altaria en a cruz en os eixemplars mas granizos. As razas de gran porte son os equidos vivos mas grans en l'actualidat, y encara d'entre os Perissodactyla nomás son superaus por os rinoceronts.

Tiene a cabeza poderosa, con o mueso largo rematau en labios rectangulars, musculosos y prénsils, que le gosan servir ta triar eficientment o que pastura. Como muitos atros herbivoros, o mueso ye a on se concentra la mayor finura en o sentiu d'o tacto, tot servindo-le como organo táctil además d'olfactivo. Disposa de numerosas mimbrisas u «bigotes», que son esparzos y no arringleraus (como sí que en son en os carnivoros) que acreixentan a percibilidat táctil de l'animal.

Os uellos son laterals en a cabeza y dotan a o caballo d'una buena visión. A vista ye o sentiu principal en a vida d'os caballos, que además tienen buena oida y olfacto. As orella son chicorronas (en comparanza con as de belatros Equidae), rematan en punta y pueden dirichir-las t'abant y ta dezaga, a cual cosa les sirve no solo que ta orientar-las millor cara ta's sonius sino tamién ta expresar bels estaus emocionals basicos (interés, hostilidat, etc.) que chugan un paper important en a interacción con belatros caballos.

O cuello ye muit fuerte y describe un arco convexo, suportando o peso entero d'a cabeza. O lomo, por contra, describe un arco a la inversa d'entre os cuatros debanteros y os zagueros. Os caballos esquinazaus son precisament os que tienen ixa curvatura ta l'interior mas marcada de o que estaría normal.

As patas son fuertes y, de regular, largas. Cualques razas pueden estar garra-curtas y belatras tener as patas mas largas. A musculatura tamién depende d'a raza y de l'alimentación, estando especialment visible a musculatura d'as cuixas, propia d'un animal corredor. Aspectualment, os caballos resultan «pernilons» (de cuixas grans) se se's contripara con atros cuadrupedos. Os pietz rematan en un solo dido, que posei una sola ungla que se conoix como casco. Os primers equidos en teneban mas, de didos, pero o linache d'os actuals miembros d'o chenero Equus es atrofión.

A coda ye fina, no guaire musculosa, anque sustentada sobre un esqueleto de vertebras (como en toz os mamiferos). Arriba aproximadament dica os chinullos pero ye poco visible de natural pus se troba cubierta de pels largos, de crinera.

Os caballos, como toz os equidos, son herbivoros que s'alimentan preferentment de hierba, palla y atras materias vechetals fibrosas pero no remugan. Ta desfer os grans polimeros de celulosa, que no son aprofitables por os mamiferos sin l'aduya d'os microrganismos y un proceso complexo de dichestión quimica, os caballos tienen un budiello bolsudo grandismo que fa funcions analochicas con o estomago multi-cameral d'os bovidos y os remugants.

Como toz os equidos, tienen as extremidaz rematatas en un solo dido, a on que os altros se son vistos redueitos dica la desaparición total con a evolución. O dido central remata en una firme ungla (o casco) que recubre cuasi de tot a zaguera falanche d'a extremidat, con o semblant d'ixe estrato cornio, l'animal carreya tot o suyo peso en alto d'a ungla y ta privar-ne d'o desgaste, en os animals que tiban u carreyan pesos, se mete una ferradura per baixo d'ella.

A capeza ye bien gran, con orellas chicotas y una mandibula fuerta y lierga que per a base suya liga os ponderosos musclos maseteros de l'animal, y per o cabo suyo tien as incisivas que o caballo emplega ta redallar a hierba. A dentición completa de l'adulto tiene 40 piezas, entre d'as cuals i existen dos caninas muito rudimentarias que només se gosan manifestar en os masclos.

O tubo dichestivo ye una mica mes complexo que no en os carnivoros, encara que no tanto como en os remugadors. Per contra que no los remugadors, os equidos en cheneral, y especialment os caballos, tienen o bodiello especialment voluminoso (d'entre os 80 y os 130 ls. só que en o colon, con 35 ls. mes en o ciego, en comparanza con os menos de 15 ls. de l'estomago)

A evolución ha feto que sufra unas modificacions osias importants, como l'aumento d'a mida suya u, especialment, d'as suyas extremidaz; a on que s'ha redueito o numbro d'os didos ta un solo que ye embolicato de material cornio (o casco). En as extremidaz debanteras o cubito y lo radio son soldatos en un solo ueso, mesmo en a tibia y lo peroné, que privan que l'animal pueda chirar as suyas mans y pietz.

Os uesos d'a capeza son liargos, y os d'a cara fan una lonchitut dople que en o cranio. A mandibla ye tamién liarga y tien una superficie ampla y planera en a parti inferior de l'aria posterior. A espinada tiene 51 vertebras.

As suyas orichens s'han de mirar en America d'o Norte, a on que yeran extinguitos dica l'arribata d'os espanyols. Se i troboron eixemplars de 55 millons d'anyos entazaga, d'o chenero Hyracotherium (u Eohippus), abe ixes tiempos l'abantepasato de toz os Equus mudernos. l'Eohippus teneba una mida chica, que bailaba d'os 20 dica los 40 cm d'altaria, con cuatre didos en as extremidaz anteriors y 3 en as de posteriors, con un aspecto externo similar a un can u talment una rabosa actuals. Tamién s'ha trobato eixemplars d'ixa especie en Europa.

A evolución de l'Eohippus el fació medrar en altaria dica los 115 cm y perder os didos dica que quedó monodactilo. Poquet a poquet, o suyo solo dido se fació mes y mes duro dica tornar-se o casco que le feba posible de fuyir d'os predadors.

l'Eohippus abría alavez d'evolucionar posteriorament enta una especie dita Mesohippus, que ya teneba os piez con forma de casco. Dimpués, o Meryhippus y lo Pliohippus habrían o puesto ta lo chenero Equus.

O primer puesto a on que se i domesticó lo caballo estioron as estepas de Rusia y Ucraína y selvas d'arredol, a on que i veviba lo tarpán (Equus caballus gmelini), considerato l'agrotipo d'os caballos domesticos. Bi ha razas de caballo que tienen chens de l'atra subespecie salvache de caballo Equus caballus pzewalskii.

Os caballos pueden dormir de piez u estesos en o suelo. Tienen a capacidat de dormir-se leverament mientres que s'están d'alto de piez u de fer sestedetas, que se conoix que ye una adaptación t'a vida como animal de presa en libertat, perque cuan os animals se chitan tumbos ye prou mes fácil que los cace bel depredador. A capacidat suya ta dormir de piez chace d'un "sistema de contención" en as patas suyas que les permit de relaxar os musclos suyos en dormindo-se, sin de cayer redondos.

En comparanza con os humans, os caballos no precisan garra periodo de suenio ininterrupto, si que pueden chuntar toz os periodos de suenio que les calen, de dormideta en dormideta, siempre curtas, dica achuntar o periodo de suenio completo. Os caballos pueden dormir en cualsiquier puesto mientres que siga de días, y dormir d'entre 4 y 14 horas diarias de suenio levero interrupto cuan son de piez, y d'entre bels minutos dica diversas horas cuan son liargos en o suel. Se crei, tamién, que de toz ixes tiempos que os caballos s'están pareix que adurmiertos, a mes gran parte no el son pas, estando per un regular o periodo diario de suenio d'entre bels minutez dica bel par d'oras. Diz que se considera que ta os caballos en ye prou con un par d'horas y meya de dormir regularment en un periodo total de 24 horas, a mes gran parte d'a dormida s'escaix repartita de butiadetas de 15 minutos cadaguna.

Os caballos precisan de chitar-se tumbos ta gosar arribar en a fase R.E.M. No precisan si que una hora u dos cada diversos días t'acomplir os suyos requerimientos de suenio R.E.M. Se ye observato que cuan un caballo le se mantiene forzadament de piez y nunca no le se deixa tumbar-se, muestra os simtomas de manca de suenio en pocos días, y eventualment puet arribar dica a fallar-le las fuerzas y cayer involuntariament en suenio R.E.M. mientres se trobe en una fase de suenio levero. Os ditos casos son diferents d'os casos de narcolepsia, que os caballos tamién pueden sofrir.

Os caballos duermen millor cuan se troban en grupos perque, en ixas cercunstancias, mientres que cualcuns d'os animals duermen bels altros pueden mantener a guardia ta privar d'eventuals ataques de depredadors. Un caballo que se mantienga totalment solo no gosará nunca dormir bien, perque os suyos instintos le fan siempre cauto y de mirar que no le viengan a sorprender garra altros periglos.

En l'actualidat en os países mas desarrollaus a mayoría d'os caballos son utilizaus pa practicar esportes eqüestres como os blincos, as cursas de caballos, o polo, a doma clasica, lo rodeyo, a doma, o horseball, o concurso completo, o campo a través u pentatlón moderno entre d'atros.

En l'actualidat existen tres disciplinas ecuestres que fan parte d'o programa olimpico: doma clasica, blincos y concurso completo. Anteriorment hi heba mas disciplinas eqüestres consideradas olimpicas, estas estioron o polo, volteo, blinco alto y blinco largo. En o pentatlón moderno, entre d'atras prebas no ecuestres, bi ha una preba de cursas de caballos.

A relación con os humans dende l'antigüedat ha feito que muitos caballos d'os reis, nobles y personaches notables fuesen conoixitos, os mas conoixitos son Bucefalo, caballo de Aleixandre lo Gran, Estrategos d'Aníbal, Genitor de Chulio César, Incitatus de Caligula, Othar o tarpán d'Atila, Babieca caballo de Rodrigo Díaz de Vivar, Marengo un d'os caballos de Napoleón Bonaparte, Comanche o solo caballo que sobrevivió a Batalla de Little Big Horn, As de Oros de Emiliano Zapata y Siete leguas de Pancho Villa.

En a literatura bi ha caballos que son conoixitos como: Rocinante caballo de Alonso de Quijano en El Quijote, Tornado de El Zorro u Sombragris de Gandalf.

• Caballo de Przewalski.
• Equidae.
• Abrío.
• Caballería.
• Caballo (mitolochía).
• Chinete.

• Wikispecies tiene un articlo sobre Equus caballus.
• Se veigan as imáchens de Commons sobre es caballos.
• (en) A base de datos d'a cría de caballos
• (en) Albeitería de caballos en eXtension.com