Digital object identifier

L'identificador d'oxetu dixital, conocíu n'inglés como digital object identifier y embrivíu DOI, ye un sistema paecíu a los identificadores URI. L'oxetu puede ser cualquier entidá o cosa, física, dixital o abstracta. Una forma común d'emplegar el sistema DOI ye dar a les publicaciones científiques un númberu específicu que cualesquier pue usar p'alcontrar al traviés de la Rede'l citáu artículu. A diferencia del sistema URL, usáu nes páxines web, el sistema DOI nun camuda col pasu del tiempu anque l'artículu seya reasitiáu nuna direición distinta, yá que lleva la información incorporada en forma de metadatos.

Digital object identifier
Abreviatura	DOI, ДОИ y ЦІО
Creación	2000
Web oficial	Web oficial

El sistema de control DOI ellaborólu la Corporación Nacional pa Iniciatives d'Investigación (CNRI), una asociación de los Estaos Xuníos d'América non llucrativa destinada a promover el desenvolvimientu de les teunoloxíes de la información y la comunicación nel campu de la investigación científica.

En Brasil, la Plataforma Lattes nacional de Desenvolvimientu Científicu y Teunolóxicu (CNPq), por casu, usa'l DOI como una forma dixital de la certificación de la producción de lliteratura grabada polos investigadores nos sos C.V. Lattes. Cuando un programa navegador atopa un númberu DOI, utiliza'l prefixu p'atopar la base de datos del editor y asina tener accesu a la información sobre'l llibru o periódicu, que puede incluyir datos de catálogu, crítiques y enllaces. Esti sistema empezó a usase apocayá en Brasil, y ta aplicándose en delles soluciones DRM.