Buku Joel

1:1 On ma hata ni Jahowa tu si Joel, anak ni si Petuel. ᯀᯉᯬ᯲ ᯔ ᯂᯖ ᯉᯪ ᯐᯂᯬᯋ ᯖᯮ ᯘᯪ ᯐᯬᯀᯞᯩ᯲ ᯀᯉᯄ᯦᯲ ᯉᯪ ᯘᯪ ᯇᯩᯖᯮᯀᯞᯩ᯲

1:2 Tangihon ma hata on hamu ale angka sintua, jala patinggil pinggolmuna, sude hamu isi ni tano on! Tung dung ma masa songon i di angka arimuna, manang di angka ari ni ompumuna i?

1:3 Torsahon hamu ma tu angka anakmuna taringot tusi, jala anakmuna tu anaknasida, jala anaknasida muse tu sundut di pudina.

1:4 Na tinebahon ni antatadu digagat sihapor, jala na tinebahon ni sihapor digagat tamponok, jala na tinebahon ni tamponok digagat gulomit.

1:5 Ngot ma hamu, angka na mabuk, jala tumatangis ma hamu! Jala mangandung ma saluhut hamu angka sisobur anggur, ala ni anggur na pang, ala naung suda dibuat sian pamanganmuna.

1:6 Ai nangkok do tu tanongku * sada bangso na tang jala na so habilangan; iponna tudoshon ipon ni singa, jala saitna tudoshon sait ni singa boruboru.

1:7 Nunga ranggason hau anggurhu dibahen, jala nunga matultul ia hau antajaungku, tung dilangkati situtu do jala diparumpak, pola mamontar angka rantingna.

1:8 Mangandung ma ho, songon boru muli, na martujung hori ala ni bangunan ni haposoonna.

1:9 Nunga siap * pelean sipanganon dohot siinuman sian joro ni Jahowa, margudompong angka malim, angka parhalado ni Jahowa.

1:10 Nunga tarulang ladang, duhuton ia hauma, ala lusam eme, jala marsik aek ni anggur, malos ia hau jetun.

1:11 Marlangan ma, hamu angka paruma, mangandung ma hamu parporlak anggur, ala ni eme saba dohot eme tur, ai nunga mago partaonan.

1:12 Nunga pola apean hau anggur, jala nunga ranggason hau antajau; nang hau dalimo dohot harambir dohot hau unte ro di saluhut hau na di ladang nunga malos, ai nunga mandao las ni roha sian anak ni jolma.

1:13 Marhohos ma, hamu ale angka malim, jala mangandungi! Mangangguhi ma, hamu ale angka parhalado di langgatan! Masuk ma hamu, laos marbulusan abit hori bornginna i, hamu ale angka parhalado ni Debatangku, ala naung munsat sian joro ni Debatamuna * pelean sipanganon dohot siinumon.

1:14 Parbadiai hamu ma sada ari parpuasaon, tingtingkon hamu sada ari raya, paluhut hamu angka sintua ro di sude isi ni luaton tu joro ni Jahowa Debatamuna, jala mangangguhi ma hamu tu Jahowa.

1:15 Oe ari na marjea on! Ai jonok nama * ari ni Jahowa, jala songon hasisiap sian na sun hinagogo harorona.

1:16 Nda nunga sun siap sipanganon di adopan ni matanta? Sian joro ni Debatanta * las ni roha dohot olopolop?

1:17 Nunga busuk angka boni di toru ni bungkina, nunga tarulang angka bagas parugasanan, nunga maloha angka sopo, ai nunga rahar eme i.

1:18 Maheu ia pinahan marisuang! Bodiaron do angka parduan ni lombu, ala soada jampalan di nasida; gari angka parduaan ni birubiru rapar do.

1:19 Tu ho do, ale Jahowa, ahu joujou! Ai nunga suda dipangan api angka jampalan di halongonan, jala mosok do sude hau di ladang * dibahen api rarat.

1:20 Gari pinahan di balian * marhoi tu ho do, ai nunga marsik angka sunge, jala nunga suda dipangan api angka jampalan di halongonan.

2:1 Palu hamu ma sarune di Sion, jala marsurak ma hamu di atas dolok habadiaonki! Angka hitir ma sude isi ni tano on, ai na ro ne ma * ari ni Jahowa, tung jonok na ma.

2:2 * Ari haholomon do i jala hagolapon, ari ombun na marhobot dohot ombun manorop; songon sibalik hunik manogotna i mangerbang songgop tu angka dolok, songon i ma ro ** sada bangso na timbul jala na tang, * ndang dung adong sisongon i sian na robi, tu joloan on pe ndang adong be jumpang songon i pola marsundutsundut.

2:3 * Api na manganhon di jolona, jala di pudina marjillamjillam; songon porlak Eden tano on di jolona alai anggo di pudina halongonan na hasang do, jala ndang adong na malua nanggo sada sian ibana.

2:4 Songon rumang ni angka hoda rumangna, jala songon halak parsihundul parinjakna.

2:5 Songon pardorom ni angka hureta di punsu ni angka dolok paringkatnasida, songon soara ni jilam ni api na manganhon durame, songon bangso na tang na gopas marsinjata tu hamusuon.

2:6 Marsahit rian angka bangso maradophon ibana, marlangan be sude bohi ni jolma.

2:7 Martahop nasida songon ulubalang na begu, songon halak parmusu dijangkiti nasida parik, jala masitondong dalanna be nasida, jala ndang mamedu nasida sian dalannasida i.

2:8 Jala ndang masisosahan nasida, masitondong dalanna be nasida, marragean do nasida marhitehite hujur palait, laos so mansohot do marporang.

2:9 Di bagasan huta nasida marmeang muli, marinjak di atas parik, angka bagas do dipanaek, bongot sian pandiloan songon panangko.

2:10 Angka hitir do tano on maradophon nasida, humuntal angka langit, * mangkolom do mata ni ari dohot bulan, pola dohot angka bintang maniopi sondangna.

2:11 Jala dipangiar Jahowa do suarana manguluhon paranganna, ai tung * na torop situtu do paranganna; tung na gogo do ibana pasaut hatana i; tung * na bolon do ari ni Jahowa, jala na songkal sahali, tung ise ma manahan disi?

2:12 Alai nuaeng pe, ninna Jahowa: Sai * mulak ma hamu tu ahu sian nasa rohamuna mardongan parpuasaon, partangison dohot angguhangguk.

2:13 Jala rohamuna ma ribahi hamu, unang asal ulosmuna, sai mulak ma hamu tu Jahowa, Debatamuna i! Ai * pardengganbasa jala parasi roha do ibana, lambas do ibana tarrimas jala parasi roha godang, jala tibu marpangulahi rohana mida hamagoan i.

2:14 Ise umbotosa, * anggiat tung mulak ibana jala marpangulahi rohana, jala ditadingkon pasupasu sada sian pudina bahen pelean sipanganon dohot siinumon di Jahowa, Debatamuna i.

2:15 Palu hamu ma sarune di Sion! Parbadiai hamu ma sada parpuasaon, tingtingkon hamu ma ari raya sada!

2:16 Paluhut hamu ma bangso i, parbadiai hamu ma luhutan i! Paluhut hamu ma angka sintua, papungu hamu ma angka dakdanak ro di angka posoposo na onsop manusu! Ruar ma pangoli sian bilutna dohot oroan i sian bilutna.

2:17 Ingkon tumatangis ma di holangkolang ni emper dohot langgatan malim, angka parhalado ni Jahowa, dohononnasida ma: Sai marpangulahi ma roham, ale Jahowa, mida bangsom, jala unang pasahat bangso na niainmu gabe sialingon, gabe pambuatan hulingkulingan ni angka parbegu! Boasa ma tung mehet di tongatonga ni angka bangso; * didia do nuaeng Debatanasida i?

2:18 Jadi mangiburu ma Jahowa humongkop tanona, jala marpangulahi rohana mida bangsona.

2:19 Dung i ninna Jahowa ma mangalusi bangsona: Ida ma, tongosonku ma tu hamu eme dohot anggur dohot miak, asa butong hamu sian i; jala ndang be bahenonku hamu * marhaurahon di tongatonga ni angka bangso.

2:20 Jala * paholangonku do sian hamu sipangago i, jala onjaronku ibana tu tano na hasang dohot na tarulang; angka parjolona tu laut na tungkan habinsaran, jala angka na parpudi tu laut na tungkan hasundutan. Jadi manaek ma angirna, manaek dohot busukna, ala tenga pambahenna.

2:21 Unang ma mabiar ho, ale tano, marolopolop ma ho jala marlas ni roha, ai timbul do pambahen ni Jahowa!

2:22 Unang mabiar hamu, ale pinahan di ladang, ai martumbur muse angka jampalan di halongonan, jala marparbue angka hau i, lehonon ni hau antajau dohot anggur muse gogonasida.

2:23 Antong marolopolop jala marlas ni roha ma hamu, ale angka anak ni Sion mida Jahowa, Debatamuna i! Ai ibana mangalehon tu hamu udan panaburon bahen pamintorion, jala * dipatuat tu hamu udan tipotipo, udan panaburon dohot udan gotilon patumonaan.

2:24 Jadi tambun ma eme di angka pardegean, jala binsat angka pangilangan sian anggur dohot miak.

2:25 Jadi marsingkat ma tu hamu bahenonku angka taon panggagatan ni antatadu, * sihapor, tamponok dohot gulomit, paranganku na godang, angka na hupaborhat i dompak hamu.

2:26 Dung i datdatanmuna ma mangan jala butong, jala pujionmuna ma * goar ni Jahowa, Debatamuna i, na mambahen hamu marhasurungan, jala ndang be tarurak bangsongku salelenglelengna.

2:27 Tandaonmuna ma disi, paboa ahu di tongatonga ni Israel, jala ahu Jahowa, Debatamuna i, jala ndang adong dungkon ni ahu; jala ndang be tarurak bangsongku ro di salelenglelengna.

3:1 Jadi dung songon i: Pangusehonongku ma * Tondingku tu nasa sibuk, gabe manurirangi ma angka anakmuna dohot borumuna, marnipi ma angka sintuamuna, jala maralatan angka dolidolimuna.

3:2 Dohot do tu angka naposomuna baoa dohot boruboru pangusehononku di angka ari i Tondingku.

3:3 Jala pamasaonku do angka partinandaon di langit dohot di tano on: Mudar dohot api dohot timus na marsijongjong.

3:4 Muba do mata ni ari gabe haholomon, jala bulan gabe mudar, patujolo ni ari haroro ni Jahowa na bolon jala na songkal i.

3:5 Alai * nasa na manjou goar ni Jahowa, malua do, ai * di atas ni dolok Sion dohot di Jerusalem masa haluaon, songon na pinarbaga ni Jahowa hian, jala di tongatonga ni halak na malua i do angka na jinou ni Jahowa.