មើលលក្ខខណ្ឌ​ប្រើប្រាស់ជាភាសាផ្សេងទៀត�� հայերեն, ខ្មែរ, فارسی, ລາວ, Hmong, ium, Filipino, العربية, 中文（中国）, 中文（台灣）, हिन्दी, 日本語, 한국어, ਪੰਜਾਬੀ, Русский, Español (Latinoamérica), ไทย, Українська, Tiếng Việt និង English

លក្ខខណ្ឌ​នៃ​សេវាកម្ម

ចុះ​ថ្ងៃទី​៖ 15 ធ្នូ 2023

លក្ខខណ្ឌ​ប្រើប្រាស់

YouTube សូមស្វាគមន៍!

សេចក្ដីផ្ដើម
សូមអរគុណសម្រាប់ការប្រើប្រាស់ថ្នាល YouTube និងផលិតផល សេវាកម្ម និងមុខងារនានា​ដែលយើងផ្ដល់ជូនអ្នកជាផ្នែកមួយនៃថ្នាលនេះ (ជារួមហៅថា “សេវាកម្ម” )។ 

សេវាកម្មរបស់យើង

សេវាកម្មនេះអនុញ្ញាតឲ្យអ្នកស្វែងរក មើល និងចែករំលែកវីដេអូ និងមាតិកាផ្សេងទៀត ផ្ដល់វេទិកាសម្រាប់ឲ្យមនុស្សភ្ជាប់ទំនាក់ទំនង ជូនដំណឹង និងបំផុសគំនិតអ្នកដទៃទូទាំងសកលលោក និងដើរតួជាថ្នាលចែកចាយសម្រាប់អ្នកបង្កើតមាតិការដើម និងអ្នកផ្សាយពាណិជ្ជកម្មទាំងធំនិងតូច។ យើងផ្ដល់ព័ត៌មានជាច្រើនអំពីផលិតផលរបស់យើង និងរបៀបប្រើប្រាស់ផលិតផលទាំងនោះនៅក្នុងHelp Centerរបស់យើង។ អ្នកអាចស្វែងយល់អំពី YouTube Kids កម្មវិធីជាដៃគូរបស់ YouTube និងសមាជិក​ភាពដែលត្រូវបង់ប្រាក់របស់ YouTube និងការទិញ (បើមានផ្ដល់ជូន) និងអ្វីៗជាច្រើនទៀត។ អ្នកក៏អាចអានគ្រប់យ៉ាងអំពីមាតិកាដែលសប្បាយរីករាយនៅលើឧបករណ៍ផ្សេងទៀត ដូចជាទូរទស្សន៍របស់អ្នក ឧបករណ៍លេងហ្គេមរបស់អ្នក ឬ Google Home។

អ្នកផ្ដល់សេវាកម្មរបស់អ្នក

ស្ថាប័នដែលផ្ដល់សេវាកម្មនេះគឺ Google LLC ជាក្រុមហ៊ុនមួយដែលធ្វើប្រតិបត្តិការក្រោមច្បាប់ Delaware ដែលមានទីតាំងស្ថិតនៅ 1600 Amphitheatre Parkway, Mountain View, CA 94043 (ហៅកាត់ថា “YouTube”, “យើង” ឬ “របស់យើង”)។ ការលើកឡើងអំពី “សម្ព័ន្ធ” របស់ YouTube ក្នុងលក្ខខណ្ឌទាំងនេះសំដៅលើក្រុមហ៊ុនផ្សេងទៀតនៅក្នុងគ្រុបក្រុមហ៊ុន Alphabet Inc. (នាពេលនេះ ឬនាពេលអនាគត)។

លក្ខខណ្ឌអនុវត្ត
ការប្រើប្រាស់សេវាកម្មនេះរបស់អ្នកត្រូវគោរពតាមលក្ខខណ្ឌទាំងនេះ គោលការណ៍​ណែនាំ​សហគមន៍របស់ YouTube និងគោលការណ៍ សុវត្ថិភាព និងគោលការណ៍​សិទ្ធិអ្នកនិពន្ធ​ ដែលអាចត្រូវបានធ្វើបច្ចុប្បន្នភាពម្ដងម្កាល (រួមគ្នាហៅថា "កិច្ចព្រមព្រៀង"នេះ)។ កិច្ចព្រមព្រៀងរបស់អ្នកជាមួយយើងក៏នឹងរួមបញ្ចូលគោលការណ៍ស្ដីពីការផ្សាយពាណិជ្ជកម្មនៅលើ YouTube ប្រសិនបើអ្នកផ្ដល់ការផ្សាយពាណិជ្ជកម្ម ឬការឧបត្ថម្ភទៅកាន់សេវាកម្មនេះ ឬរួមបញ្ចូលការផ្សព្វផ្សាយ​ដោយបង់ប្រាក់ក្នុងមាតិការបស់អ្នក។ ឯកសារ​យោង ឬតំណភ្ជាប់ផ្សេងទៀតដែលបានផ្ដល់ជូនក្នុងលក្ខខណ្ឌទាំងនេះគឺប្រើប្រាស់សម្រាប់​ផ្ដល់ព័ត៌មាន​តែប៉ុណ្ណោះ​ និងមិនមែនជាផ្នែកមួយនៃកិច្ចព្រមព្រៀងនេះឡើយ។

សូមអានកិច្ចព្រមព្រៀងនេះដោយប្រុងប្រយ័ត្ន និងសូមប្រាកដថាអ្នកយល់កិច្ចព្រមព្រៀងនេះ។ ប្រសិនបើអ្នកមិនយល់អំពីកិច្ចព្រមព្រៀងនេះ ឬមិនទទួលយកផ្នែកណាមួយនៃកិច្ចព្រមព្រៀងនេះទេ នោះអ្នកមិនអាចប្រើសេវាកម្មនេះបានឡើយ។ 

តើអ្នកណាខ្លះអាចប្រើសេវាកម្មនេះបាន?

លក្ខខណ្ឌអាយុ
អ្នកត្រូវតែមានអាយុយ៉ាងហោចណាស់ 13​ ឆ្នាំ ដើម្បីប្រើប្រាស់សេវាកម្មនេះ ទោះយ៉ាងណាកុមារគ្រប់​វ័យ​ទាំងអស់អាចប្រើប្រាស់សេវាកម្មនេះ និង YouTube Kids (បើមានផ្ដល់ជូន) ប្រសិនបើបានអនុញ្ញាតដោយមាតាបិតា ឬអាណាព្យាបាលស្របច្បាប់។

ការអនុញ្ញាតដោយមាតាបិតា ឬអាណាព្យាបាល

ប្រសិនបើអ្នកមានអាយុក្រោម 18 ឆ្នាំ នោះអ្នកអះអាងថាអ្នកមានការអនុញ្ញាតពីមាតាបិតា ឬអាណាព្យាបាលរបស់អ្នកដើម្បីប្រើប្រាស់សេវាកម្មនេះ។ សូមឱ្យគាត់អានកិច្ចព្រមព្រៀងនេះជាមួយអ្នក។

ប្រសិនបើអ្នកគឺជាមាតាបិតា ឬអាណាព្យាបាលស្របច្បាប់របស់អ្នកប្រើប្រាស់ដែលមានអាយុក្រោម 18 ឆ្នាំ តាមរយៈការអនុញ្ញាតឱ្យកូនរបស់អ្នកប្រើប្រាស់សេវាកម្មនេះ អ្នកគោរពតាមលក្ខខណ្ឌនៃកិច្ចព្រមព្រៀងនេះ និងទទួលខុសត្រូវចំពោះសកម្មភាពរបស់កូនអ្នកនៅលើសេវាកម្មនេះ។ អ្នកអាចស្វែងរកមធ្យោបាយនិងធនធានដើម្បីជួយអ្នកគ្រប់គ្រងបទពិសោធ​ប្រើប្រាស់​របស់​គ្រួសារ​អ្នកនៅលើ YouTube (រួមបញ្ចូលទាំងរបៀបបើកដំណើរការឱ្យកុមារអាយុក្រោម 13 ឆ្នាំប្រើប្រាស់សេវាកម្មនេះ និង YouTube Kids) នៅក្នុងHelp Centerរបស់យើង និងតាមរយៈ Family Link របស់ Google។

អាជីវកម្ម
ប្រសិនបើអ្នកកំពុងប្រើប្រាស់សេវាកម្មនេះក្នុងនាមជាក្រុមហ៊ុន ឬស្ថាប័នមួយ អ្នកអះអាងថាអ្នកមានសិទ្ធិធ្វើសកម្មភាពតាងនាមឲ្យស្ថាប័ននោះ ហើយស្ថាប័ននោះទទួលយកកិច្ចព្រមព្រៀងនេះ។

ការប្រើប្រាស់សេវាកម្មនេះរបស់អ្នក

មាតិកានៅលើសេវាកម្មនេះ
មាតិកានៅលើសេវាកម្មនេះរួមមានវីដេអូ សំឡេង (ឧទាហរណ៍ តន្ត្រី និងសំឡេងផ្សេងទៀត) ក្រាហ្វិករូបថត អក្សរ (ដូចជាមតិ និងស្គ្រីប) ការកសាងម៉ាក (រួមមានពាណិជ្ជនាម ពាណិជ្ជសញ្ញា សេវាសញ្ញា ឬនិមិត្តសញ្ញា) មុខងារបែបអន្តរកម្ម កម្មវិធី មេទ្រិក និងអ្វីផ្សេងទៀត មិនថាផ្ដល់ជូនដោយអ្នក, YouTube ឬតតិយជនទេ (រួមគ្នាហៅថា "មាតិកា")។ 

មាតិការគឺជាការទទួលខុសត្រូវរបស់បុគ្គល ឬស្ថាប័នដែលផ្ដល់មាតិកានេះទៅកាន់សេវាកម្មនេះ។ YouTube មិនមានកាតព្វកិច្ចបង្ហោះ ឬផ្ដល់ជូនមាតិការទេ។ ប្រសិនបើអ្នកឃើញមាតិកាណាមួយ ដែលអ្នកជឿថាមិនអនុលោមតាមកិច្ចព្រមព្រៀងនេះ រួមទាំងការបំពានគោលការណ៍ណែនាំសហគមន៍ ឬច្បាប់ អ្នកអាចរាយការណ៍មាតិកានោះមកកាន់យើងបាន។

គណនី Google និងឆាណែល YouTube
អ្នកអាចប្រើប្រាស់ផ្នែករបស់សេវាកម្មនេះ ដូចជាការរុករក និងការស្វែងរកមាតិកា ដោយមិនមានគណនី Google។ ទោះជាយ៉ាងណា អ្នកត្រូវការគណនី Google ដើម្បីប្រើប្រាស់មុខងារមួយចំនួន។ ជាមួយគណនី Google អ្នកអាចចូលចិត្តវីដេអូ ​ជាវ​ឆាណែល បង្កើតឆាណែល YouTube របស់អ្នកផ្ទាល់ និងច្រើនទៀត។ អ្នកអាចអនុវត្តតាមការណែនាំទាំងនេះដើម្បីបង្កើតគណនី Google។ 

ការបង្កើតឆាណែល YouTube នឹងផ្ដល់ឲ្យអ្នកនូវសិទ្ធិចូលប្រើប្រាស់មុខងារ និងលក្ខណៈពិសេសបន្ថែមដូចជាការបង្ហោះវីដេអូ ការផ្ដល់មតិ ឬការបង្កើតកម្រង​វីដេអូ (បើមានផ្ដល់ជូន)។ នេះជាព័ត៌មានលម្អិតមួយចំនួនអំពីរបៀបបង្កើតឆាណែល YouTube របស់អ្នកផ្ទាល់។ 

ដើម្បីការពារគណនី Google របស់អ្នក សូមរក្សាពាក្យ​សម្ងាត់របស់អ្នកជាការសម្ងាត់​។ អ្នកមិនគួរប្រើប្រាស់ពាក្យសម្ងាត់​គណនី Google របស់អ្នកឡើងវិញនៅលើកម្មវិធីរបស់តតិយជនទេ។ ស្វែងយល់បន្ថែមអំពីការរក្សាគណនី Google របស់អ្នកឱ្យមានសុវត្ថិភាព រួមទាំងអ្វីដែលត្រូវធ្វើប្រសិនបើអ្នកដឹងអំពីការប្រើប្រាស់គណនី Google ឬពាក្យ​សម្ងាត់របស់អ្នកដោយគ្មានការអនុញ្ញាត។

ព័ត៌មានរបស់អ្នក
គោលការណ៍​ឯកជនភាពរបស់យើងពន្យល់អំពីរបៀបដែលយើងចាត់ចែងទិន្នន័យផ្ទាល់ខ្លួនរបស់អ្នក ហើយការពារឯកជនភាពរបស់អ្នកនៅពេលដែលអ្នកប្រើប្រាស់សេវាកម្មនេះ។ ការ​ជូន​ដំណឹង​អំពីឯកជនភាព​របស់ YouTube Kids ផ្ដល់ព័ត៌មានបន្ថែមអំពីការអនុវត្តឯកជនភាពរបស់យើងដែលជាក់លាក់ចំពោះ YouTube Kids។ 

យើងនឹងដំណើរការមាតិកាសោតទស្សន៍ ឬជាសំឡេងណាមួយដែលបានបង្ហោះដោយអ្នកទៅកាន់សេវាកម្មនេះ ដោយអនុលោមតាមលក្ខខណ្ឌនៃ​ការ​ដំណើរការ​ទិន្នន័យ YouTube លើកលែងតែក្នុងករណីដែលអ្នកបានបង្ហោះមាតិកាបែបនោះសម្រាប់គោលបំណងផ្ទាល់ខ្លួន ឬសកម្មភាពគ្រួសារ។ ស្វែងយល់បន្ថែម។

ការអនុញ្ញាត និងការ​ដាក់​កំហិត
អ្នកអាចចូលប្រើប្រាស់ និងប្រើសេវាកម្មនេះ ដែលមានផ្ដល់ជូនអ្នក ដរាបណាអ្នកអនុលោមតាមកិច្ចព្រមព្រៀងនេះ និងច្បាប់ពាក់ព័ន្ធ។ អ្នកអាចមើល ឬស្ដាប់មាតិការសម្រាប់ការប្រើប្រាស់ផ្ទាល់ខ្លួនរបស់អ្នក ដែលមិន​មែនប្រើប្រាស់ជាលក្ខណៈ​ពាណិជ្ជកម្ម។ អ្នកក៏អាចបង្ហាញវីដេអូ YouTube តាមរយៈYouTube Player ដែលអាចបង្កប់បាន។ 

ការ​ដាក់​កំហិតខាងក្រោមអនុវត្តចំពោះការប្រើប្រាស់សេវាកម្មនេះរបស់អ្នក។ អ្នកមិនត្រូវបានអនុញ្ញាតឲ្យ៖

1. ចូលប្រើប្រាស់ ផលិតឡើងវិញ ទាញយក ចែកចាយ បញ្ជូន ផ្សាយ បង្ហាញ លក់ ចេញអាជ្ញាបណ្ណ កែប្រែ កែសម្រួល ឬប្រើប្រាស់ផ្នែកណាមួយនៃសេវាកម្មនេះ ឬមាតិការណាមួយ លើកលែងតែ៖ (ក) ដូចបានផ្ដល់សិទ្ធិយ៉ាងច្បាស់ដោយសេវាកម្មនេះ ឬ (ខ) ដោយមានការអនុញ្ញាត​ជាលាយលក្ខណ៍អក្សរជាមុនពី YouTube និងពីម្ចាស់សិទ្ធិរៀងៗខ្លួន បើមាន 
2. គេចវេះ បិទ​ដំណើរការ ចូលរួមដោយក្លែងបន្លំ ឬជ្រៀតជ្រែកចូលផ្នែកណាមួយនៃសេវាកម្មនេះ (ឬប៉ុនប៉ងធ្វើសកម្មភាពណាមួយក្នុងចំណោមសកម្មភាពទាំងនេះ) រួមទាំងមុខងារពាក់ព័ន្ធនឹងសុវត្ថិភាព ឬមុខងារដែល (ក) ទប់ស្កាត់ ឬដាក់កំហិតការចម្លង ឬការប្រើប្រាស់ផ្សេងទៀតលើមាតិកា ឬ (ខ) ដាក់កំហិតលើការប្រើប្រាស់សេវាកម្មនេះ ឬមាតិកា
3. ចូលប្រើសេវាកម្មនេះដោយប្រើប្រាស់វិធីស្វ័យប្រវត្តិណាមួយ (ដូចជាមនុស្សយន្ត បូតណិត ឬស្ក្រេបភឺ) លើកលែងតែ (ក) ក្នុងករណីកម្មវិធីស្វែងរកសាធារណៈ ដោយអនុលោមតាមឯកសារ robots.txt របស់ YouTube ឬ (ខ) ដោយមានការអនុញ្ញាត​ជាលាយលក្ខណ៍អក្សរជាមុនពី YouTube
4. ប្រមូល ឬប្រមូលផ្ដុំព័ត៌មាន ដែលអាចកំណត់អត្តសញ្ញាណបុគ្គល (ឧទាហរណ៍ ឈ្មោះអ្នកប្រើប្រាស់ ឬមុខ) លើកលែងតែត្រូវបានអនុញ្ញាតដោយបុគ្គលនោះ ឬត្រូវបានអនុញ្ញាតក្រោមផ្នែក (3) ខាងលើ
5. ប្រើប្រាស់សេវាកម្មនេះដើម្បីចែកចាយមាតិកាផ្សព្វផ្សាយ ឬមាតិកាពាណិជ្ជកម្មដែលមិនបានស្នើសុំ ឬការស្នើសុំទ្រង់ទ្រាយធំឬដែលមិនចង់បានផ្សេងទៀត
6. បង្ក ឬលើកទឹកចិត្តឲ្យមានការវាស់ស្ទង់ដែលមិនត្រឹមត្រូវណាមួយលើការបន្តទាក់ទាញអ្នកប្រើប្រាស់ពិតប្រាកដ​ចំពោះ​សេវាកម្មនេះ រួមទាំងតាមរយៈការបង់ប្រាក់ឲ្យមនុស្ស ឬផ្ដល់ឲ្យពួកគេនូវរង្វាន់លើកទឹកចិត្ត ដើម្បីបង្កើនចំនួនមើល ចំនួនចូលចិត្ត ឬមិនចូលចិត្តវីដេអូ ឬដើម្បីបង្កើនចំនួនអ្នកជាវឆាណែលឬបំភ្លៃមេទ្រិកតាមរបៀបណាមួយ
7. ការប្រើខុសនូវដំណើរការរាយការណ៍ សម្គាល់ ប្ដឹង ជំទាស់ ឬប្ដឹងតវ៉ា រួមទាំងតាមរយៈការដាក់ស្នើដោយគ្មានមូលដ្ឋាន គ្មានមូលហេតុត្រឹមត្រូវ ឬឥតបានការ 
8. ដំណើរការការប្រកួតប្រជែងនៅលើ ឬតាមរយៈសេវាកម្មនេះដែលមិនអនុលោមតាមគោលការណ៍ណែនាំ និងគោលការណ៍ស្ដីពីការប្រកួតប្រជែងរបស់ YouTube 
9. ប្រើប្រាស់សេវាកម្មនេះដើម្បីមើល ឬស្ដាប់មាតិកា ក្រៅពីការប្រើប្រាស់ផ្ទាល់ខ្លួន មិន​មែន​ពាណិជ្ជកម្ម (ឧទាហរណ៍ អ្នកប្រហែលជាមិនបញ្ចាំងវីដេអូ ឬចាក់តន្ត្រីជាសាធារណៈពីសេវាកម្មនេះ) ឬ
10. ប្រើប្រាស់សេវាកម្មនេះដើម្បី (ក) លក់ការផ្សាយពាណិជ្ជកម្ម ការ​ឧបត្ថម្ភ ឬការផ្សព្វផ្សាយណាមួយ ដែលត្រូវបានដាក់នៅលើ នៅជុំវិញ ឬនៅក្នុងសេវាកម្មនេះ ឬមាតិកាជាជាងអ្វីដែលបានអនុញ្ញាតនៅក្នុងគោលការណ៍ស្ដីពីការផ្សាយពាណិជ្ជកម្មនៅលើ YouTube (ដូចជាការផ្សាយពាណិជ្ជកម្មផលិតផលដែលអនុលោមតាម) ឬ (ខ) លក់ការផ្សាយពាណិជ្ជកម្ម ការ​ឧបត្ថម្ភ ឬការផ្សព្វផ្សាយនៅលើទំព័រណាមួយនៃគេហទំព័រឬកម្មវិធីណាមួយដែលមានតែមាតិកាពីសេវាកម្មនេះ ឬដែលមាតិកាពីសេវាកម្មនេះគឺជាមូលដ្ឋានចម្បងសម្រាប់ការលក់នេះ (ឧទាហរណ៍ ការលក់ការផ្សាយពាណិជ្ជកម្មនៅលើគេហទំព័រ ដែលវីដេអូ YouTube គឺជាចំណុចទាក់ទាញចម្បងសម្រាប់ឲ្យអ្នកប្រើប្រាស់ចូលមើលគេហទំព័រនោះ)។ 

ការ​រក្សាសិទ្ធិ

ការប្រើប្រាស់សេវាកម្មនេះមិនផ្ដល់ឲ្យអ្នកនូវកម្មសិទ្ធិ ឬសិទ្ធិលើផ្នែកណាមួយនៃសេវាកម្មនេះ រួមមានឈ្មោះអ្នកប្រើប្រាស់ ឬមាតិការណាមួយផ្សេងទៀតដែលបានបង្ហោះដោយអ្នកដទៃ ឬ YouTube។

អភិវឌ្ឍ កែលម្អ និងធ្វើបច្ចុប្បន្នភាពសេវាកម្មនេះ

YouTube កំពុងផ្លាស់ប្ដូរ និងកែលម្អសេវាកម្មនេះជាបន្តបន្ទាប់។ ជាផ្នែកមួយនៃការវិវឌ្ឍជាបន្តបន្ទាប់នេះ យើងអាចធ្វើការកែសម្រួល ឬផ្លាស់ប្ដូរ (មកលើផ្នែកណាមួយ ឬផ្នែកទាំងអស់នៃសេវាកម្មនេះ) ដូចជាការបញ្ចូល ឬការលុបមុខងារនិងការដំណើរការ ការផ្ដល់សេវាកម្មឬមាតិកាឌីជីថលថ្មី ឬការឈប់បន្តសេវាកម្មឬមាតិការចាស់ៗ។ យើងក៏ប្រហែលជាត្រូវផ្លាស់ប្ដូរ ឬឈប់បន្តសេវាកម្មនេះ ឬផ្នែកណាមួយនៃសេវាកម្មនេះ ដើម្បីធ្វើការកែលម្អប្រតិបត្តិការឬសុវត្ថិភាព ធ្វើការផ្លាស់ប្ដូរដើម្បីអនុលោមតាមច្បាប់ ឬទប់ស្កាត់សកម្មភាពខុសច្បាប់នៅលើប្រព័ន្ធ ឬការបំពានប្រព័ន្ធរបស់យើង។ ការផ្លាស់ប្ដូរទាំងនេះអាចប៉ះពាល់អ្នកប្រើប្រាស់ទាំងអស់ អ្នកប្រើប្រាស់មួយចំនួន ឬអ្នកប្រើប្រាស់ដែលជារូបវន្តបុគ្គល។ នៅពេលសេវាកម្មនេះតម្រូវឱ្យមាន ឬរួមបញ្ចូលសុសវែរដែលអាចទាញយកបាន (ដូចជាកម្មវិធី YouTube Studio) សុសវែរនោះអាចធ្វើបច្ចប្បន្នភាពដោយស្វ័យប្រវត្តិនៅលើឧបករណ៍របស់អ្នកនៅពេលដែលមុខងារ ឬកំណែថ្មីអាចប្រើបាន អាស្រ័យលើការកំណត់ឧបករណ៍របស់អ្នក។ ប្រសិនបើយើងធ្វើការផ្លាស់ប្ដូរជាសារវន្ត ដែលមានផលប៉ះពាល់អវិជ្ជមានលើការប្រើប្រាស់សេវាកម្មនេះរបស់អ្នក យើងនឹងផ្ដល់ការជូនដំណឹងជាមុន​ដែលសមហេតុផលដល់អ្នក លើកលែងតែក្នុងស្ថានភាពបន្ទាន់ដូចជា ការទប់ស្កាត់ការបំពាន ការឆ្លើយតបទៅនឹងលក្ខខណ្ឌតម្រូវតាមផ្លូវច្បាប់ ឬការដោះស្រាយបញ្ហាសុវត្ថិភាព និងប្រតិបត្តិការ។ យើងក៏នឹងផ្ដល់ជូនអ្នកផងដែរនូវ ឱកាសដើម្បីយកចេញមាតិការបស់អ្នកពីគណនី​ Google របស់អ្នក ដោយប្រើប្រាស់ Google Takeout ដោយអនុលោមតាមគោលការណ៍ និងច្បាប់ជាធរមាន។ 

មាតិកា និងការប្រព្រឹត្តរបស់អ្នក

ការបង្ហោះមាតិកា

ប្រសិនបើអ្នកមានឆាណែល YouTube អ្នកអាចបង្ហោះមាតិកាទៅកាន់សេវាកម្មនេះ។ អ្នកអាចប្រើប្រាស់មាតិការបស់អ្នកដើម្បីផ្សព្វផ្សាយសហគ្រាសសិល្បៈ ឬអាជីវកម្មរបស់អ្នក។ ប្រសិនបើអ្នកជ្រើសរើសបង្ហោះមាតិកាអ្នកមិនត្រូវដាក់បញ្ជូនទៅកាន់សេវាកម្មនេះនូវមាតិកាណាមួយដែលមិនអនុលោមតាមកិច្ចព្រមព្រៀងនេះទេ (រួម​មានគោលការណ៍​ណែនាំ​សហគមន៍របស់ YouTube) ឬច្បាប់ឡើយ។ ឧទាហរណ៍ មាតិកាដែលអ្នកដាក់បញ្ជូនមិនត្រូវរួមបញ្ចូលកម្មសិទ្ធិបញ្ញារបស់តតិយជនទេ (ដូចជាមាតិកាដែលមានការរក្សាសិទ្ធិអ្នកនិពន្ធ)  លុះត្រាតែអ្នកមានការអនុញ្ញាតពីភាគីនោះ ឬត្រូវបានផ្ដល់សិទ្ធិស្របច្បាប់ឲ្យធ្វើបែបនោះ។ អ្នកមានការទទួលខុសត្រូវផ្លូវច្បាប់លើមាតិការដែលអ្នកដាក់បញ្ជូនទៅកាន់សេវាកម្មនេះ។ អ្នកអាចប្រើប្រាស់ប្រព័ន្ធស្វ័យប្រវត្តិ ដែលវិភាគមាតិកាបស់អ្នក ដើម្បីជួយរកមើលការរំលោភបំពាន និងការបំពានដូចជា សារ​ឥត​បាន​ការ កម្មវិធីគ្រោះថ្នាក់ និងមាតិកាខុសច្បាប់។

សិទ្ធិដែលអ្នកផ្ដល់

អ្នករក្សាកម្មសិទ្ធិលើមាតិការរបស់អ្នក។ ទោះជាយ៉ាងណា យើងតម្រូវឲ្យអ្នកផ្ដល់សិទ្ធិជាក់លាក់ទៅឱ្យ YouTube និងអ្នកប្រើប្រាស់សេវាកម្មនេះផ្សេងទៀត ដូចបានរៀបរាប់ខាងក្រោម។ 

ការផ្ដល់អាជ្ញាបណ្ណទៅឱ្យ YouTube

តាមរយៈការផ្ដល់មាតិកាទៅឱ្យសេវាកម្មនេះ អ្នកផ្ដល់ឱ្យ YouTube នូវអាជ្ញាបណ្ណដែលអាចផ្ទេរបាននិងដែលអាចផ្ដល់អាជ្ញាបណ្ណបន្តបាន ដោយគ្មានសួយសារ មិនផ្ដាច់មុខ និងនៅទូទាំងពិភពលោក ដើម្បីប្រើប្រាស់មាតិការនោះ (រួមទាំងផលិតឡើងវិញ ចែកចាយ រៀបចំស្នាដៃបន្ត បង្ហាញ និងធ្វើវា) ទាក់ទងនឹងសេវាកម្មនេះ និងអាជីវកម្មរបស់ YouTube (និងសម្ព័ន្ធនិងសន្តតិជនរបស់ខ្លួន) រួមទាំងក្នុងគោលបំណងផ្សព្វផ្សាយ និងចែកចាយបន្តផ្នែកណាមួយ ឬផ្នែកទាំងអស់នៃសេវាកម្មនេះ។

ការផ្ដល់អាជ្ញាបណ្ណទៅឱ្យអ្នកប្រើប្រាស់ផ្សេងទៀត

អ្នកក៏អាចផ្ដល់សិទ្ធិឲ្យអ្នកប្រើប្រាស់សេវាកម្មនេ���នីមួយៗផ្សេងទៀតនូវអាជ្ញាបណ្ណដែលគ្មានសួយសារ មិនផ្ដាច់មុខ នៅទូទាំងពិភពលោក ដើម្បីចូលប្រើប្រាស់មាតិការបស់អ្នកតាមរយៈសេវាកម្ម​នេះ និងដើម្បីប្រើប្រាស់មាតិការនោះ រួមមានផលិតឡើងវិញ ចែកចាយ រៀបចំស្នាដៃបន្ត បង្ហាញនិងធ្វើវា ដូចដែលបានបើកដំណើរការដោយមុខងាររបស់សេវាកម្មនេះតែប៉ុណ្ណោះ (ដូចជាការចាក់វីដេអូ ឬការបង្កប់)។ សម្រាប់ភាពច្បាស់លាស់ អាជ្ញាបណ្ណនេះមិនផ្ដល់ការអនុញ្ញាត ឬសិទ្ធិណាមួយសម្រាប់ឲ្យអ្នកប្រើប្រាស់ធ្វើការប្រើប្រាស់មាតិការរបស់អ្នកដាច់ដោយឡែកពីសេវាកម្មនេះឡើយ។

រយៈពេលអាជ្ញាបណ្ណ

​អាជ្ញាបណ្ណដែលបានផ្ដល់ដោយអ្នក បន្តមានក្នុងរយៈពេលសមហេតុផលមួយផ្នែកពាណិជ្ជកម្ម ក្រោយពេលអ្នកដកចេញ ឬលុបមាតិការបស់អ្នកចេញពីសេវាកម្មនេះ។ ទោះយ៉ាងណា អ្នកយល់ដឹង និងយល់ព្រមថា YouTube អាចរក្សាទុកច្បាប់ចម្លងក្នុងម៉ាស៊ីនមេនៃវីដេអូរបស់អ្នកដែលត្រូវបានដកចេញឬលុបចេញ ប៉ុន្តែមិនបង្ហាញ ចែកចាយ ឬដំណើរការ​ច្បាប់ចម្លងទាំងនោះឡើយ។ 

សិទ្ធិរក​ចំណូល

អ្នកផ្ដល់សិទ្ធិឱ្យ YouTube រកចំណូលពីមាតិការរបស់អ្នកនៅលើសេវាកម្មនេះ (ហើយការរកចំណូលបែបនេះអាចរួមបញ្ចូលការបង្ហាញការផ្សាយពាណិជ្ជកម្មនៅលើ ឬនៅខាងក្នុងមាតិកាឬគិតថ្លៃសេវាពីអ្នកប្រើសម្រាប់ការចូលមើល)។ កិច្ចព្រមព្រៀងនេះមិនផ្ដល់សិទ្ធិឱ្យអ្នកទទួលបានការទូទាត់ណាមួយទេ។ ចាប់ពីថ្ងៃទី 18 ខែវិច្ឆិកា ឆ្នាំ 2020 ការទូទាត់ទាំងឡាយដែលអ្នកអាចមានសិទ្ធិទទួលបានពី YouTube ស្ថិតក្រោមកិច្ចព្រមព្រៀងណាមួយផ្សេងទៀតរវាងអ្នក និង YouTube (ឧទាហរណ៍ រួមមានការទូទាត់ប្រាក់ដែលស្ថិតក្រោមកម្មវិធីដៃគូ YouTube, សមាជិក​ភាព​ឆាណែល ឬ Super Chat) នឹងត្រូវបានចាត់ទុកថាជាសួយសារ។  ប្រសិនបើតម្រូវដោយច្បាប់ Google នឹងកាត់ពន្ធពីការទូទាត់បែបនោះ។

ការដកមាតិការបស់អ្នកចេញ

អ្នកអាចដកមាតិការបស់អ្នកចេញពីសេវាកម្មនេះបានគ្រប់ពេល។ អ្នកក៏មានជម្រើសក្នុងការថតចម្លងមាតិការបស់អ្នកមុនពេលដកវាចេញផងដែរ។ អ្នកត្រូវតែដកមាតិការបស់អ្នកចេញ ប្រសិនបើអ្នកលែងមានសិទ្ធិ ដែលបានតម្រូវដោយលក្ខខណ្ឌទាំងនេះ។

ការដកមាតិការចេញដោយ YouTube

ប្រសិនបើមាតិកាណាមួយរបស់អ្នក (1) ល្មើសលើកិច្ចព្រមព្រៀងនេះ ឬ (2) អាចបង្ក​គ្រោះថ្នាក់ដល់​ YouTube, អ្នកប្រើប្រាស់របស់យើង ឬតតិយជន យើងរក្សាសិទ្ធិក្នុងការដកចេញ ឬលុបមាតិការមួយចំនួន ឬទាំងអស់នោះចេញតាមការសម្រេចចិត្តរបស់យើង។ យើងនឹងជូនដំណឹងដល់អ្នកជាមួយហេតុផលសម្រាប់សកម្មភាពរបស់យើង លើកលែងតែយើងជឿជាក់ដ���យសមហេតុផលថាការធ្វើបែបនេះ៖ (ក) អាចល្មើសច្បាប់ ឬការណែនាំរបស់អាជ្ញាធរ​អនុវត្តន៍ច្បាប់ ឬបើមិនដូច្នោះទេអាចមានហានិភ័យក្នុងការទទួលខុសត្រូវផ្លូវច្បាប់សម្រាប់ YouTube និងសម្ព័ន្ធរបស់យើង (ខ) អាចប៉ះពាល់ដល់ការស៊ើបអង្កេត ឬសុចរិតភាព ឬប្រតិបត្តិការរបស់សេវាកម្មនេះ ឬ (គ) អាចបង្កគ្រោះថ្នាក់ដល់អ្នកប្រើប្រាស់ទាំងឡាយ,​តតិយជនផ្សេងទៀត, YouTube, ឬសម្ព័ន្ធរបស់យើង។ អ្នកអាចស្វែងយល់បន្ថែមអំពីការរាយការណ៍ និងការអនុវត្តច្បាប់ រួមទាំងរបៀបប្ដឹងតវ៉ានៅលើទំព័រការ​ដោះស្រាយ​បញ្ហានៃHelp Centerរបស់យើង។ 

ការពិន័យតាម​គោលការណ៍​ណែនាំ​សហគមន៍

YouTube ធ្វើប្រតិបត្តិការប្រព័ន្ធ "ការពិន័យ" ពាក់ព័ន្ធនឹងមាតិកាដែលបំពានគោលការណ៍​ណែនាំ​សហគមន៍ YouTube។ ការពិន័យនីមួយៗមានការ​ដាក់​កំហិតផ្សេងៗ ហើយអាចបណ្ដាលឱ្យមានការលុបឆាណែលរបស់អ្នកចេញពី YouTube ជាអចិន្ត្រៃយ៍។   ការពណ៌នាពេញលេញអំពីរបៀបដែលការពិន័យប៉ះពាល់ដល់ប៉ុស្តិ៍របស់អ្នកមាននៅលើទំព័រ  មូលដ្ឋានគ្រឹះនៃការពិន័យ​តាម​គោលការណ៍​ណែនាំ​សហគមន៍។ ប្រសិនបើអ្នកជឿថាការពិន័យត្រូវបានធ្វើឡើងដោយមិនត្រឹមត្រូវ អ្នកអាចប្ដឹងតវ៉ានៅទីនេះ។ 

ប្រសិនបើឆាណែលរបស់អ្នកត្រូវបានដាក់កំហិត ដោយសារការពិន័យ អ្នកមិនត្រូវប្រើប្រាស់ឆាណែលមួយទៀតដើម្បីគេចវេះពីការដាក់កំហិតទាំងនេះទេ។ ការបំពានលើការហាមប្រាមនេះគឺជាការល្មើសជាសារវន្តលើកិច្ចព្រមព្រៀងនេះ ហើយ Google រក្សាសិទ្ធិក្នុងការបិទគណនី Google របស់អ្នក ឬបញ្ឈប់ការចូលប្រើប្រាស់របស់អ្នកទៅកាន់ផ្នែកណាមួយ ឬផ្នែកទាំងអស់នៃសេវាកម្មនេះ។

ការការពារសិទ្ធិអ្នកនិពន្ធ

យើងផ្ដល់ព័ត៌មានដើម្បីជួយម្ចាស់សិទ្ធិអ្នកនិពន្ធគ្រប់គ្រងកម្មសិទ្ធិ​បញ្ញារបស់ពួកគេនៅលើអ៊ីនធឺណិត នៅក្នុងYouTube Copyright Centerរបស់យើង។ ប្រសិនបើអ្នកជឿថាសិទ្ធិអ្នកនិពន្ធរបស់អ្នកត្រូវបានបំពាននៅលើសេវាកម្មនេះ សូមផ្ញើការជូនដំណឹងមកយើង។ 

យើងឆ្លើយតបចំពោះការជូនដំណឹងអំពីការ​ចោទប្រកាន់ថាបាន​រំលោភ​លើសិទ្ធិអ្នកនិពន្ធ ដោយយោងតាមដំណើរការនៅក្នុងYouTube Copyright Center របស់យើង ដែលអ្នកក៏អាចស្វែងរកព័ត៌មានអំពីរបៀបដោះស្រាយការពិន័យលើការបំពានសិទ្ធិអ្នកនិពន្ធបានផងដែរ។ គោលការណ៍របស់ YouTube ចែងអំពីការបិទការចូលប្រើប្រាស់សេវាកម្មនេះរបស់ជនដែលរំលោភបំពានដដែលៗ ក្នុងកាលៈទេសៈដែលសមរម្យ។

ការផ្អាក និងការបិទគណនី

ការបិទដោយអ្នក
អ្នកអាចឈប់ប្រើប្រាស់សេវាកម្មនេះបានគ្រប់ពេល។ អនុវត្តតាមការណែនាំទាំងនេះ ដើម្បីលុបសេវាកម្មនេះចេញពីគណនី Google របស់អ្នក ដែលរួមមានការបិទឆាណែល YouTube របស់អ្នក និងការដកទិន្នន័យរបស់អ្នកចេញ។ អ្នកក៏មានជម្រើសដើម្បីទាញយកច្បាប់ចម្លងនៃទិន្នន័យរបស់អ្នកជាមុនសិនផងដែរ។ 

ការបិទ និងការផ្អាកដោយ YouTube

YouTube រក្សាសិទ្ធិក្នុងការផ្អាក ឬបិទគណនី Google របស់អ្នក ឬការចូលប្រើប្រាស់របស់អ្នកទៅកាន់ផ្នែកណាមួយ ឬផ្នែកទាំងអស់នៃសេវាកម្មនេះ ប្រសិនបើ (ក) អ្នកល្មើសកិច្ចព្រមព្រៀងនេះជាសារវន្ត ឬដដែលៗ (ខ) យើងត្រូវបានតម្រូវឱ្យធ្វើបែបនេះ ដើម្បីអនុលោមតាមលក្ខខណ្ឌតម្រូវតាមផ្លូវច្បាប់ ឬដីកាតុលាការ ឬ (គ) យើងជឿជាក់ដោយសមហេតុផលថាមានសកម្មភាព ដែលបង្កើត (ឬអាចបង្កើត) ការទទួលខុសត្រូវ ឬការ​បង្ក​គ្រោះថ្នាក់​ចំពោះអ្នកប្រើប្រាស់ណាមួយ, តតិយជនផ្សេងទៀត, YouTube ឬសម្ព័ន្ធរបស់យើង។

ការជូនដំណឹងសម្រាប់ការបិទ ឬការផ្អាក

យើងនឹងជូនដំណឹងដល់អ្នកជាមួយហេតុផលសម្រាប់ការបិទ ឬការផ្អាកដោយ YouTube លើកលែងតែយើងជឿដោយសមហេតុផលថាការធ្វើបែបនេះ៖ (ក) អាចបំពានច្បាប់ ឬការណែនាំរបស់អាជ្ញាធរ​អនុវត្តន៍ច្បាប់ (ខ) អាចប៉ះពាល់ដល់ការស៊ើបអង្កេត (គ) អាចប៉ះពាល់ដល់សុចរិតភាព ប្រតិបត្តិការ ឬសុវត្ថិភាពនៃសេវាកម្មនេះ ឬ (ឃ) អាចបង្កគ្រោះថ្នាក់ដល់អ្នកប្រើប្រាស់ណាមួយ, តតិយជនផ្សេងទៀត, YouTube ឬសម្ព័ន្ធរបស់យើង។ 

ផលប៉ះពាល់នៃការបិទ ឬការផ្អាកគណនី

ប្រសិនបើគណនី Google របស់អ្នកត្រូវបានបិទ ឬការចូលប្រើប្រាស់សេវាកម្មនេះរបស់អ្នកត��រូវបានដាក់កំហិត អ្នកអាចបន្តប្រើប្រាស់ផ្នែកជាក់លាក់នៃសេវាកម្មនេះ (ដូចជាបានតែ​មើល​) ដោយមិនមានគណនី ហើយកិច្ចព្រមព្រៀងនេះនឹងបន្តអនុវត្តចំពោះការប្រើប្រាស់បែបនេះ។ ប្រសិនបើអ្នកជឿថាការបិទ ឬការផ្អាកនេះត្រូវបានធ្វើឡើងដោយមិនត្រឹមត្រូវ អ្នកអាចប្ដឹងតវ៉ាដោយប្រើប្រាស់ទម្រង់បែបបទនេះ។

អំពីសុសវែរក្នុងសេវាកម្មនេះ

សុសវែរដែលអាចទាញយកបាន
នៅពេលដែលសេវាកម្មនេះតម្រូវឲ្យមាន ឬរួមបញ្ចូលសុសវែរដែលអាចទាញយកបាន (ដូចជាកម្មវិធី YouTube Studio) លុះត្រាតែសុសវែរនោះមិនត្រូវបានគ្រប់គ្រងដោយលក្ខខណ្ឌបន្ថែមដែលផ្ដល់អាជ្ញាបណ្ណ នោះ YouTube ផ្ដល់ឲ្យអ្នកនូវអាជ្ញាបណ្ណដែល មិនអាចផ្ទេរនិងមិនផ្ដាច់មុខ គ្មានសួយសារ នៅទូទាំងពិភពលោក មានលក្ខណៈផ្ទាល់ខ្លួន ដើម្បីប្រើប្រាស់សុសវែរ ដែលបានផ្ដល់ជូនអ្នកដោយ YouTube ជាផ្នែកមួយនៃសេវាកម្មនេះ។ អាជ្ញាបណ្ណនេះមានគោលបំណងតែមួយគត់ក្នុងការធ្វើឲ្យអ្នកអាចប្រើប្រាស់ និងរីករាយជាមួយអត្ថប្រយោជន៍នៃសេវាកម្មនេះ ដូចបានផ្ដល់ជូនដោយ YouTube តាមរបៀបដែលបានអនុញ្ញាតដោយកិច្ចព្រមព្រៀងនេះ។ អ្នកមិនត្រូវបានអនុញ្ញាតឲ្យចម្លង កែសម្រួល ចែកចាយ លក់ ឬជួលផ្នែកណាមួយនៃសុសវែរ ឬធ្វើវិស្វកម្មបញ្ច្រាស ឬប៉ុនប៉ងដកស្រង់កូដប្រភពរបស់សុសវែរនោះទេ លើកលែងតែច្បាប់ហាមប្រាមការដាក់កំហិតទាំងនេះ ឬអ្នកមានការអនុញ្ញាត​ជាលាយលក្ខណ៍អក្សររបស់ YouTube។

កូដ​ចំហ
សុសវែរមួយចំនួនដែលបានប្រើប្រាស់ក្នុងសេវាកម្មរបស់យើងអាចត្រូវបានផ្ដល់ជូនស្ថិតក្រោមអាជ្ញាបណ្ណ​កូដចំហ ដែលយើងមានផ្ដល់ជូនសម្រាប់អ្នក។ អាចមានបញ្ញត្តិ​ក្នុងអាជ្ញាបណ្ណ​កូដចំហ ដែលលុបយ៉ាងច្បាស់ពីលើលក្ខខណ្ឌមួយចំនួននេះ ដូច្នេះសូមប្រាកដថាអានអាជ្ញាបណ្ណទាំងនោះ។ 

លក្ខខណ្ឌផ្លូវច្បាប់ផ្សេងទៀត

សេចក្ដីប្រកាសមិនទទួលខុសត្រូវក្នុងការធានា
ក្រៅពីដូចបានបង្ហាញយ៉ាងច្បាស់ក្នុងកិច្ចព្រមព្រៀងនេះ ឬដូចបានតម្រូវដោយច្បាប់ សេវាកម្មនេះត្រូវបានផ្ដល់ជូន "ដូចនេះ" ហើយ YOUTUBE មិនមានការប្តេជ្ញាជាក់លាក់ណាមួយ ឬការធានាអំពីសេវាកម្មនេះទេ។ ឧទាហរណ៍ យើងមិនធ្វើការធានាណាមួយអំពី៖ (ក) មាតិកាដែលបានផ្ដល់ជូនតាមរយៈសេវាកម្មនេះ (ខ) មុខងារជាក់លាក់នៃសេវាកម្មនេះ ឬភាពត្រឹមត្រូវ ភាពអាច​ជឿ​ទុកចិត្ត​បាន លទ្ធភាពផ្ដល់ជូន ឬសមត្ថភាពរបស់​សេវាកម្មនេះ​ក្នុងការបំពេញតាមសេចក្ដីត្រូវការរបស់អ្នក ឬ (គ) ថាមាតិកាណាមួយដែលអ្នកដាក់បញ្ជូននឹងអាចចូលប្រើប្រាស់បាននៅលើសេវាកម្មនេះទេ។   

ដែនកំណត់នៃការទទួលខុសត្រូវ

លើកលែងតែដូចបានតម្រូវដោយច្បាប់ជាធរមាន, YOUTUBE, សម្ព័ន្ធ, មន្ត្រី, អភិបាល, និយោជិត និងភ្នាក់ងាររបស់ខ្លួននឹងមិនទទួលខុសត្រូវលើការបាត់បង់ប្រាក់ចំណេញ, ចំណូល, ឱកាសអាជីវកម្ម, កេរ្ដិ៍ឈ្មោះជំនួញ ឬប្រាក់សន្សំដែលបានរំពឹងទុកមុន ការបាត់បង់ឬការខូចទិន្នន័យ ការបាត់បង់ដោយប្រយោលឬដោយចំពោះ សំណងជំងឺចិត្តដែលបង្កដោយ៖

1. បញ្ហា កំហុស ឬភាពមិនត្រឹមត្រូវនៅលើសេវាកម្មនេះ
2. ការរងរបួសដល់​បុគ្គល ឬការបំផ្លាញ​ទ្រព្យសម្បត្តិ ដែលជាលទ្ធផលពីការប្រើប្រាស់សេវាកម្មនេះរបស់អ្នក
3. ការចូលប្រើ ឬការប្រើប្រាស់សេវាកម្មនេះដោយគ្មានការអនុញ្ញាតណាមួយ
4. ការរំខាន ឬការបញ្ឈប់ណាមួយលើសេវាកម្មនេះ
5. មេរោគ ឬកូដ​គ្រោះថ្នាក់ណាមួយដែលបានបញ្ជូនទៅកាន់ ឬតាមរយៈសេវាកម្មនេះដោយតតិយជនណាមួយ
6. មាតិកាណាមួយ មិនថាត្រូវបានដាក់បញ្ជូនដោយអ្នកប្រើប្រាស់ ឬ YOUTUBE រួមទាំងការប្រើប្រាស់មាតិការបស់អ្នក និង/ឬ 
7. ការលុប ឬការមិនមានផ្ដល់ជូនខ្លឹមសារណាមួយ។

បញ្ញត្តិនេះអនុវត្តចំពោះការទាមទារទាំងឡាយ មិនថាការទាមទារដែលបានអះអាងនោះផ្អែកលើការធានា កិច្ចសន្យា​ អំពើអនីត្យានុកូល ឬទ្រឹស្ដីច្បាប់ណាមួយផ្សេងទៀតឡើយ។

ការទទួលខុសត្រូវទាំងស្រុងរបស់ YOUTUBE និងសម្ព័ន្ធរបស់ខ្លួនលើការទាមទារណាមួយដែលកើតឡើងពី ឬដែលពាក់ព័ន្ធនឹងសេវាកម្មនេះត្រូវបានដាក់កំហិតមកត្រឹមចំនួនច្រើនជាងរវាង៖ (ក) ចំនួនប្រាក់ចំណូលដែល YOUTUBE បានទូទាត់ឱ្យអ្នកពីការប្រើប្រាស់សេវាកម្មនេះរបស់អ្នកក្នុងរយៈពេល 12​ ខែមុនកាលបរិច្ឆេទនៃការជូនដំណឹងរបស់អ្នកជាលាយលក្ខណ៍អក្សរទៅកាន់ YOUTUBE អំពីការទាមទារនោះ និង (ខ) USD $500។

សំណង

ក្នុងវិសាលភាពដែលអនុញ្ញាតដោយច្បាប់ជាធរមាន អ្នកយល់ព្រមក្នុងការការពារ ផ្ដល់សំណង និងមិនបង្កការខូចខាតដល់ YouTube, សម្ព័ន្ធ, មន្ត្រី, អភិបាល, និយោជិត និងភ្នាក់ងាររបស់ខ្លួន ពី និងចំពោះការទាមទារ ការខូចខាត កាតព្វកិច្ច​ ការបាត់បង់ ការទទួលខុសត្រូវ បន្ទុកចំណាយឬបំណុល និងការចំណាយ (រួមមានជាអាទិ៍ ថ្លៃសេវាមេធាវី) ដែលកើតឡើងពី៖ (i) ការប្រើប្រាស់ និងការចូលប្រើសេវាកម្មនេះរបស់អ្នក (ii) ការបំពានលក្ខខណ្ឌណាមួយនៃកិច្ចព្រមព្រៀងនេះរបស់អ្នក (iii) ការបំពានសិទ្ធិតតិយជនណាមួយរបស់អ្នក រួមមានជាអាទិ៍ សិទ្ធិអ្នកនិពន្ធ ទ្រព្យសម្បត្តិ ឬសិទ្ធិឯកជនភាព ឬ (iv) ការអះអាងណាមួយដែលមាតិការបស់អ្នកបានបង្កការខូចខាតដល់តតិយជន។ កាតព្វកិច្ចផ្ដល់សំណង និងការពារនេះនឹងបន្តមានក្រោយបញ្ចប់កិច្ចព្រមព្រៀងនេះ និងការប្រើប្រាស់សេវាកម្មនេះរបស់អ្នក។

តំណភ្ជាប់តតិយជន
សេវាកម្មអាចមានតំណទៅកាន់គេហទំព័រតតិយជន និងសេវាកម្មលើអ៊ីនធឺណិត ដែលមិនមែនជាកម្មសិទ្ធិ ឬស្ថិតក្រោមការគ្រប់គ្រងដោយ YouTube ទេ។ YouTube គ្មានការគ្រប់គ្រងលើ និងមិនមានការទទួលខុសត្រូវលើគេហទំព័រ និងសេវាកម្មលើអ៊ីនធឺណិតបែបនោះទេ។ សូមជម្រាបថានៅពេលដែលអ្នកចាកចេញពីសេវាកម្មនេះ យើងស្នើឲ្យអ្នកអានលក្ខខណ្ឌ និងគោលការណ៍​ឯកជនភាពរបស់គេហទំព័រនិងសេវាកម្មលើអ៊ីនធឺណិតរបស់តតិយជន ដែលអ្នកចូលមើល។

អំពីកិច្ចព្រមព្រៀងនេះ

ការផ្លាស់ប្ដូរកិច្ចព្រមព្រៀងនេះ
យើងអាចផ្លាស់ប្ដូរកិច្ចព្រមព្រៀងនេះ ឧទាហរណ៍ (1) ដើម្បីឆ្លុះបញ្ចាំងការផ្លាស់ប្ដូរចំពោះសេវាកម្មរបស់យើង ឬរបៀបដែលយើងធ្វើអាជីវកម្ម - ឧទាហរណ៍ នៅពេលដែលយើងបញ្ចូលមុខងារឬផលិតផលថ្មីៗ ឬដកមុខងារឬផលិតផលចាស់ចេញ (2) សម្រាប់ហេតុផលផ្នែកច្បាប់ បទប្បញ្ញត្តិ ឬសុវត្ថិភាព ឬ (3) ដើម្បីទប់ស្កាត់ការបំពានឬការបង្កគ្រោះថ្នាក់។ 

ប្រសិនបើយើងធ្វើការផ្លាស់ប្ដូរកិច្ចព្រមព្រៀងនេះជាសារវន្ត យើងនឹងផ្ដល់ការជូនដំណឹងជាមុនដែលសមហេតុផលដល់អ្នក និងឱកាសដើម្បីពិនិត្យមើលការផ្លាស់ប្ដូរនេះ លើកលែងតែ (1) នៅពេលដែលយើងដាក់ចេញនូវមុខងារ ឬផលិតផលថ្មី ឬ (2) ក្នុងស្ថានភាពបន្ទាន់ដូចជាការទប់ស្កាត់ការរំលោភបំពានដែលកំពុងកើតមាន ឬការឆ្លើយតបទៅកាន់លក្ខខណ្ឌតម្រូវតាមផ្លូវច្បាប់។ ប្រសិនបើអ្នកមិនយល់ព្រមតាមលក្ខខណ្ឌថ្មី អ្នកគួរលុបមាតិកាទាំងឡាយ ដែលអ្នកបានបង្ហោះ ហើយបញ្ឈប់ការប្រើប្រាស់សេវាកម្មនេះ។

ការបន្តកិច្ចព្រមព្រៀងនេះ
ប្រសិនបើការប្រើប្រាស់សេវាកម្មនេះរបស់អ្នកបញ្ចប់ លក្ខខណ្ឌខាងក្រោមនៃកិច្ចព្រមព្រៀងនេះនឹងបន្តអនុវត្តចំពោះអ្នក៖ “លក្ខខណ្ឌផ្លូវច្បាប់ផ្សេងទៀត” “អំពីកិច្ចព្រមព្រៀងនេះ” និងអាជ្ញាបណ្ណដែលបានផ្ដល់ដោយអ្នកនឹងបន្តមានដូចបានពណ៌នាខាងក្រោម “រយៈពេលអាជ្ញាបណ្ណ”។ 

ការផ្ដាច់ចេញពីគ្នា
ប្រសិនបើរកឃើញថាលក្ខខណ្ឌជាក់លាក់របស់កិច្ចព្រមព្រៀងនេះមិនអាចអនុវត្តបានដោយសារហេតុផលណាមួយ វានឹងមិនប៉ះពាល់ដល់លក្ខខណ្ឌផ្សេងទៀតឡើយ។

មិនមានការបោះបង់សិទ្ធិ
ប្រសិនបើអ្នកមិនអាចអនុលោមតាមកិច្ចព្រមព្រៀងនេះ ហើយយើងមិនបានចាត់វិធានការភ្លាមៗ នេះមិនមែនមានន័យថាយើងកំពុងបោះបង់សិទ្ធិណាមួយដែលយើងអាចមានទេ (ដូចជាសិទ្ធិក្នុងការចាត់វិធានការនៅពេលអនាគត)។

ការបកស្រាយ

ក្នុងលក្ខខណ្ឌទាំងនេះ ពាក្យ "រួមបញ្ចូល" ឬ "រួមមាន" មានន័យថា "រួមមានជាអាទិ៍" ហើយឧទាហរណ៍ណាមួយដែលយើងផ្ដល់ឲ្យគឺក្នុងគោលបំណងសម្រាប់ជាឧទាហរណ៍។

ច្បាប់​គ្រប់គ្រង
ការអះអាងទាំងអស់ដែលកើតចេញពី ឬដែលពាក់ព័ន្ធនឹងលក្ខខណ្ឌទាំងនេះ ឬសេវាកម្មនេះនឹងត្រូវបានគ្រប់គ្រងដោយច្បាប់កាលីហ្វ័រញ៉ា លើកលែងតែភាពផ្ទុយគ្នានៃច្បាប់វិធាន​​របស់​រដ្ឋ​កាលីហ្វ័រញ៉ា ហើយនឹង​ត្រូវ​បាន​ដោះស្រាយ​ទាំងស្រុង​នៅ​ក្នុង​តុលាការ​សហព័ន្ធ​ ឬតុលាការរដ្ឋនៃ​ស្រុក​សាន់តាក្លារ៉ា រដ្ឋ​កាលីហ្វ័រញ៉ា សហរដ្ឋអាមេរិក។ អ្នក និង YouTube យល់ព្រមចំពោះយុត្តាធិការបុគ្គល​ក្នុង​តុលាការ​ទាំងនោះ។

ដែនកំណត់លើចំណាត់ការផ្លូវច្បាប់

អ្នក និង YOUTUBE យល់ព្រមថា ដើមហេតុនៃបណ្ដឹងណាមួយដែលកើតឡើងចេញពី ឬពាក់ព័ន្ធនឹងសេវាកម្មត្រូវតែចាប់ផ្តើមក្នុងរយៈពេលមួយ (1) ឆ្នាំបន្ទាប់ពីដើមហេតុនៃបណ្ដឹងនោះកើតឡើង។ បើមិនដូច្នោះទេ ដើមហេតុនៃបណ្ដឹងនោះត្រូវបានរារាំងជាអចិន្ត្រៃយ៍។

មាន​ប្រសិទ្ធភាព​ចាប់​ពី 15 ធ្នូ 2023 (មើល​កំណែមុន)