Guía de boas prácticas para actuacións de tendido da rede de fibra óptica en contornas urbanas de especial protección e conxuntos históricos de Galicia
A Lei 5/2016, do 4 de maio, de patrimonio cultural de Galicia ten por obxecto a protección, conservación, acrecentamento, difusión e fomento do patrimonio cultural de Galicia de forma que sirva á cidadanía como unha ferramenta de cohesión social, desenvolvemento sostible e fundamento da identidade cultural do pobo galego, así como a súa investigación, valorización e transmisión ás xeracións futuras. No que se refire á incorporación de novas instalacións en conxuntos históricos ou contornas protexidas establece no Artigo 53 que: Non poderán instalarse cables e antenas que prexudiquen a apreciación dos bens, salvo que non existan solucións técnicas que resulten máis compatibles coas súas características. De acordo con este artigo, prohíbese o tendido da rede de fibra óptica por fachada ou cuberta. A única opción admisible é o tendido da rede de fibra óptica soterrado, polo espazo público e acometendo a cada inmoble a través de canalizacións soterradas, ata a caixa de derivación que se atopa nunha zona común deste.
A presente "Guía de boas prácticas para actuación de tendido de fibra óptica en contornas urbanas de especial protección e conxuntos históricos de Galicia", ten por obxecto o establecemento dunha metodoloxía de traballo que permita a incorporación do tendido de fibra óptica (de forma provisional entres non se execute a remodelación integral) nos conxuntos históricos e nas contornas urbanas e agrupacións de especial protección, ao tempo que se garanta a protección e conservación dos seus valores culturais.
Partindo sempre de que a solución idónea é enterrar toda a rede sen que exista ningún tramo de superficie por espazos públicos, as catro alternativas que se expoñen para o tramo de vía pública elixido, propoñen unha alternativa para instalar a rede de fibra óptica de maneira temporal ata que non se acometa a revisión integral de todas as redes (saneamento, fontanería, electricidade, gas, iluminación, xestión de residuos, telecomunicacións etc.).
