Malus

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Este articlo tracta sobre a especie d'árbol dita manzanera. Pa atros emplegos se veiga Manzanera (desambigación).

Malus
Florada primeral de Malus domestica, a manzanera domestica.
Denominacions populars
Manzaneras, mazaneras, pomeras
Clasificación cientifica
Dominio:	Eukaryota
Reino:	Plantae
División:	Magnoliophyta
Clase:	Magnoliopsida
Orden:	Rosales
Familia:	Rosaceae
Subfamilia:	Maloideae
Chenero:	Malus
Descripción
Malus Mill., 1754

Malus ye un chenero d'árbols y arbustos caducifolios d'a familia Rosaceae, en a subfamilia Maloideae, conoixius popularment como manzaneras u mazaneras. O chenero contiene cualques especies que se cautiva ta la obtención de a suya fruita, a manzana.

O chenero conta con especies autoctonas en as zonas fridas d'Europa, Asia y Nordamerica, que producen hibridos con cualque facilidat. A especie mas conoixida d'o chenero ye Malus domestica, a manzanera domestica, que en a suya forma actual tiene acervo chenetico de Malus sieversii (Asia central), Malus baccata (Siberia) y Malus sylvestris (Europa), de forma que no s'ha puesto establir a suya procedencia cheografica orichinal. Manimenos, bel autor sinyala a M. sieversii como l'antipasada mas probable d'as manzaneras de cultura.

Descripción

As especies de Malus son arbustos u árbols menudos, no guaire alters, que nomás en os eixemplars viellos arriban a fer 6 u 7 metros d'altaria. Con frecuencia se fan con l'aspecto d'arbustos, pus gosan dar muitos verdugos dende a base, que en as manzaneras domesticas se saca ta amillorar o creiximiento d'o tranco principal.

A crosta ye lisa, de color escura. As follas son simples, con peciolo y ovaladas, en cualques casos lobuladas, y tienen a ladera aserrada. A sobén son pilosas, de tacto suau, con a reversa tomentosa, de color blanquinyosa por a firme presencia de tomento.

As flors son simples, pentameras, con 5 sepalos y 5 petalos de forma arronchadeta, blancos u rosaus. Os estambres bailan d'entre una quincena y una cincuentena, en numero multiplo de 5 (tot en a flor ye pentamero), y son luengos y con l'antera de color amariella viva.

A manzana, a fruita d'a manzanera, ye un pseudofruito de tipo pomo. Se forma por o creiximiento y maduración d'o receptaclo a on que se sustenta os verticilos florals mientres a flor ye flor, tot rodeyando l'ovario infero cuan s'ha fecundau, y que se cierra por a part apical con os 5 sepalos que forman o caliz floral, que ye persistent en o fruito, y que cualsiquiera puet observar como a roseta pentamera vestichial que queda en o "cul" (o extremo oposau a'l rabet) de a manzana madura.

Fitonimia

En Aragón, se conoix a istes árbols mayoritariament por o fitonimo de «manzaneras», voz con a cual se les designa en aragonés y tamién en o castellano d'Aragón, que en tiene un fuerte substrato. Manzanera dimana de «manzana», y o nombre d'ista fruita viene d'o latín <(MALA) MATTIANA^[1], que designa a una variedat concreta d'ista fruita, conoixida en cheneral como <MALA, caso declinativo de <MALU(S).

O termin manzana pareix que ye una evolución de «mazana» (<MATTIANA), una forma antiga que no s'ha documentau en l'aragonés vivo sique en a fabla d'as vals d'Echo^[2] y d'Ansó^[2], en a parte nord-occidental de a Chacetania. Manzana, por contra, s'ha documentau extensament en aragonés en a resta de a cheografía. Os derivaus de <MATTIANA son comuns en tot o grupo evolutivo d'as luengas iberorromanicas, en contraposición con as derivadas de <POMMU que s'ha preferiu en os grupos occitanorromanico (catalán y occitano) y galorromanico (francés). Tanto «manzana» como «mazana» existiban mesmo en castellano antigo^[1].

A sola excepción lexica a isto, en o dominio de l'aragonés, ye a forma benasquesa «poma»^[3] (lat. <POMMA), y a consecuent forma «pomera»^[4] ta referir-se a l'árbol que da las ditas «pomas». Se tracta, pues, d'una forma local no cheneralizable a tot l'aragonés y que no queda guaire claro, conoixendo as particularidaz de o dialecto d'a val de Benás, si no ye un catalanismo lexico.