Khmeres Roxos

Khmeres Roxos
Fundador/a	Son Ngoc Minh
Fundación	30 de xunu de 1951
Sede	Pnom Penh
Ideoloxía política	Agrarismu radical, Anticonsumismu, Nacionalismu, Anticolonialismu

Khmeres Roxos ye'l nome con que se conoz a una organización llamada oficialmente Partíu Comunista de Camboya y depués Partíu Democráticu de Kampuchea. trátase d'un ensame comunista de Camboya que gobernó'l país dende 1975 hasta 1979. El nome Khmeres Roxos (en camboyanu, Khmaey Krahom) ye creación del rei Norodom Sihanuk nos años 50, y fízose popular a traviés del francés. Los miembros de la organización, por embargu, nun lu usaben, ente otres coses porque preferíen el xentiliciu kampucheo a khmer (entrambos teníen el significáu de de camboyanu).

La organización khmere caracterízase polos sos métodos autoritarios, d'una brutalidá estrema –hasta'l puntu de que se considera una forma de xenocidiu. Los Khmeres roxos fueron murniamente célebres poles sos aiciones que tan nel aniciu de la muerte d'alredor de 1,5 millones de persones (más d'una cuarta parte de la población), muertos de fame, ablayamientu o executaos. Esti balance fai del réxime de Pol Pot unu de los más sangrientos del sieglu XX.

Los dirixentes revolucionarios camboyanos son descendientes de families de la burguesía nacional. La mayor parte d'ellos ficieron los sos estudios nes universidaes fraceses na década de los 50. Dientro del ambiente parisín cosmopolita y afayadizu pal intercambiu de idees, terminen por sumase a la ideoloxía comunista.

Una vez de vuelta a Camboya estos estudiantes intenten desendolcar un movimientu de meyora de les condiciones de vida entamando un trabayu d'educación política xunto a los sos alumnos. Un Partíu comunista camboyanu autónomu con rellación al Partíu comunista indochinu (fundáu en 1931) formose'n 1951. Baxo'l Sangkum, la participanción gubernamental de dellos intelectuales fue provisional y simbólica. Constatando de que nun teníen medios financieros nin humanos na capital, y conscientes de que seríen reprimíos a curtiu plazu, los cabezaleros del Partíu échense al monte en 1962. Estudien los fundamentos de la xestión política de la población y del control policial que diríen a aplicar una vez algamáu el poder. A partir de mediaos de los 60, empobinen aiciones de guerrilla de baxa intensidá a lo llargo de la frontera vietnamita, principalmente col fin de sofitar a los comunistas vietnamitas na so guerra contra los Estaos Xuníos. En 1968, un añu depués de la revuelta campesina de Samlaut nel Noroeste, llanzaranse a la llucha armada. En 1968-1969 numberosos intelectuales siendo el blancu de persecuciones polítiques xuntense-yos nel maquis.

La ideoloxía de los khmeres Roxos nun tien modelos pero combina una forma revisada del maoísmu (qu'ellos apliquen “con creatividá”, según la espresión de Pol Pot delantre los dirixentes chinos) con idees igualitaristes llenes d'utopíes y de principios económicos anti-colonialistes tomaes de la izquierda anti-imperialista europea que los cuadros del partíu, especialmente Pol Pot, Ieng Sary y Khieu Samphan adquirieron durante la so estancia en Francia nos años cincuenta. A esto hai que xunir una voluntá de servir de modelu a otros movimientos comunistes, lloñe del “revisionismu” de Vietnam y de China (criticaos pol mantenimientu de la propiedá, de la familia, del cultu a la personalidá, del comerciu priváu, etc), y que los llevó a tener enfrentamientos colos comunistes camboyanos pola so supuesta subordinación a los vietnamites. El resultáu final yera una combinación de maoísmu con un nacionalismu extremu, qu'algamara postures averaes al racismu.

Nun ye hasta 1970 cuando l'espardimientu de la guerra de Vietnam-yos aporta sofitos de prestixu. La brutalidá de los bombardeos norteamericanos y la corrupción y los errores del gobiernu de Lon Nol permiten al partíu afitar unes bases y reclutar combatientes. Ye fundamentalmente nesta dómina cuando fueron esperimentaos numberosos principios futuros de la revolución d'abril de 1975: autarquía, centralización de los cambios económicos, militarización de la fuercia de trabayu, etc. Los Khmeres roxos lleguen a les puertes de la capital.

Finalmente el 17 d'abril de 1975, los rebeldes del FUNK (Frente Uni Nacional de Kampuchea) sitien Phnom Penh, organicen eleiciones formales nes que nun participen más que miembros del Partíu y campesinos, y instauren una nueva dictadura particularmente dura y estremista baxo'l nome de “Kampuchea Democrática”. El Partíu, representáu por una organización cuasi-mística l'Angkar Leu (un términu deriváu del vietnamita que significa escalón superior), conviértese na única referencia de poder y ta empobináu principalmente por Pol Pot, Nuon Chea, Sao Pheum, Ta Mok, Ieng Sary, Son Sen y un puñáu de llugartenientes.

En 1975, Phnom Penh foi vaciada y la so población enviada a les cooperatives pa trabayar y ser vixilada. En 1976-1977, l'alimentación en común foi definitivamente puesta'n marcha pa asegurar la igualdá de les raciones (cosa que nun foi en xeneral respetada). Esti tipu d'organización nun foi rechazada durante les últimes rectificaciones del añu 1978. La “nueva Kampuchea en tolos aspectos” busca reeducar a la población pa destruir la idea de propiedá privada. A esti fin, el Partíu-Estáu debía, según Pol Pot, calistrar en tolos requexos de la sociedá. Incluso nos ministerios, les reuniones de crítica y d'autocrítica qu'atacaben l'individualismu yeren frecuentes, y los cuadros yeren llamaos a reconstruir y a forxase nel sentíu de la sumisión a la Organización revolucionaria.

D'ello resulta un control policial de los comportamientos y de los pensamientos particularmente inquisitorial, faciéndose llamaes constantes a la vixilancia revolucionaria con rellación a los “malos elementos” y a los enemigos.

La situación económica esfarrapábase d'añu n'añu, la búsqueda d'un chivu expiatoriu y les milenta mentires ficieron la situación particularmente angustiosa y insoportable. Les execuciones yeren moneda corriente. La voluntá de multiplicar los rendimientos de la hectaria por tres y la convicción de que'l primer pasu pa escontra la industrialización yera la esportación del arroz llevaron a Pol Pot a facer pasar fame a la población camboyana pa poder algamar esos obxetivos.

Pol Pot nun cuestionó la llinia ideolóxica (alimentación en común, autarquía rexonal, incrementu del rendimientu nos campos d'arroz, ausencia de rangos nel exércitu, educación de la infancia en común, reeducación prolongada de los intelectuales patriotas...), asina nun ye hasta 1977 cuando s'esmolez por delles situaciones. Tresllada la responsabilidá de los fracasos del sistema sobre'l Partíu y desendolca unes purgues mortíferes nel so somantu, llargamente alimentaes pola so paranoia. Éstes son les purgues que llenaron el siniestru centru d'interrogación y d'execución S-21, construyíu nel vieyu institutu de Tuol Sleng.

En xineru de 1979, Vietnam invade Camboya pa poner fin al réxime. Los múltiples incidentes fronterizos ficieron esconsoñar una rivalidá plurisecular ente Camboya y Vietnam. Ensin dulda la República Socialista de Vietnam diérase cuenta de la oportunidá, poles deserciones de cuadros y de les sos propies incursiones en territoriu camboyanu, del estáu de dixebra avanzada del país, tarazáu pola fame, el miéu y les penuries. La invasión entama en payares de 1978 y Phnom Penh (ciudá pantasma, yá que taba vacía de xente dende 1975) cayó bien rápido el 7 de xineru de 1979. A pesar del miéu a la invasión vietnamita, que ta tradicionalmente afitáu nel espíritu camboyanu, l'exércitu vietnamita ye ayudáu por numberoses deserciones de Khmeres roxos y ye acoyida con aliviu pola población. El poder central tien de replegase a lo llargo de la frontera thailandesa (oficiosamente protexida por elementos del exércitu thailandés). En 1985 Khieu Samphan sucede oficialmente a Pol Pot como cabezaleru Khmer roxu.

Los Estaos Xuníos y otros gobiernos occidentales, asina como China, continúen reconociendo la Kampuchea Democrática como gobiernu de Camboya pa remarcar la so desaprobación de la ocupación vientamita, sostenida pola URSS. China llanza entos una invasión a Vietnam del Norte que fracasará totalmente. Los Estaos Xuníos sofiten la resistencia Khmer roxa por medio de los sos aliaos thailandeses. Anque dende 1980 los vietnamitas controlen el este y el centro de Camboya, los combates continúen nel oeste durante los años 80 y millones de mines son semaes. Al términu d'un deceniu de combates toles faiciones polítiques camboyanes roblen un tratáu en 1991 decretando eleiciones y el desarme. Los Khmeres roxos retomen les armes en 1992 y refuguen el resultáu de les eleiciones l'añu siguiente. Deserciones en masa tienen llugar en 1996 y la metá de los combatientes restantes (unos 4000) dexa'l movimientu. Les lluches internes lleven al procesamientu y a la encarcelación de Pol Pot polos propios Khemeres roxos en 1997. Pol Pot muerre n'abril de 1998 y Khieu Samphan ríndese'n avientu del mesmu añu.

El 29 d'avientu de 1998, los líderes Khmeres roxos restantes presenten les sos disculpes pa colos muertos dende los años 70. En 1999, la mayor parte de los miembros rindiéronse o fueron capturaos. La captura de Ta Mok en marzu de 1999 marca el puntu final de la historia de los Khmeres roxos.

• Camboya
• Pol Pot
• Colonialismu
• Guerra fría
• Xenocidiu camboyanu

• "Qué salió mal en el Régimen de Pop Pot" (F.G.) (en castellanu)
• "Pol Pot: El imperio de la muerte" (en castellanu)