Abhasi

Kiblik Abhasi Аԥсны Аҳәынҭқарра (Abhasi) Apsny Ahwyntqarra Республика Абхазия (Rus) Respublika Abkhaziya
Ibu negeri	Sukumi
Nama pengendek	Abhasi

Abhasi (hurup Arab Gundul: کبليک ابخازى; Abhasi: Аҧсны Apsny; Géorgi: აფხაზეთი Apkhazeti; Rus: Абхазия Abkhaziya) atawa resminya Kiblik Abhasi (hurup Arab Gundul: کبليک ابخازى; Abhasi: Аԥсны Аҳәынҭқарра Apsny Ahwyntqarra; Rus: Республика Абхазия Respublika Abkhaziya) entu nyang negeri separodiakuin Kaukasus Kidul, di lingir panté wètannya Laot Item, pasnya di simpangan Èropa Wètan ama Asia Kulon. Luas wilayahnya ngejembar ampé 8.665 km² (3.346 mi²) èn gableg penduduk sekitaran 245.000 orang. Ni negara punya hopstad^[1] ama kota paling gedénya entu Sukumi.

Adapun Abhasi punya kewontenan pulitik entu atu mas'alah utama deri gegucelan Abhas–Géorgi ama ubungan Géorgi–Ruslan. Sementara Abhasi diakuin merdéka ama Ruslan, Bénésuèla, Nikaragua, Nauru, ama Suriah, guwernemèn Géorgi èn ampir kabèhan negara anggota Peserèkatan Bangsa-Bangsa ngakuin Abhasi sebagé Géorgi punya bagèan wilayah.^[2] Bahna kaga' ada bestir nyang danta di dalem wilayah Abhasi, Géorgi ampé sekarang masing nggusu Abhasi punya rehèring^[3] di pengasingan di luar negeri.

Ni wilayah dulunya ada punya kuasa-sendèwèk (otonomi) di jeronya Géorgi Sowièt kapanan Uni Sowièt mulain pada misah-misah di akir-akir tahon 1980-an. Penggorèngan gelut anterkaum antara orang Abhas–ètnis has setempat–ama orang Géorgi–atu ètnis nyang paling gedé itu waktu–mingkin-mingkinan ampé kejadia Perang di Abhasi tahon 1992–1993, nyang hasilnya Géorgi keilangan kuasa di banyak wilayah Abhasi èn penginclongan ètnis Géorgi gedé-gedéan deri Abhasi.

Biar kata dipakatin itu mupakat gencetan senjata tahon 1994 èn nègosiasi tahon-tahonan, ni selèk ampé sekarang gènèngan kaga' selesé-selesé. Kehadiran let panjangnya Misi Pemanteng Peserèkatan Bangsa-Bangsa èn soldadu perdaméan Pesema'muran Negara-negara Merdéka, pimpinan Ruslan, pepes gagal bakal nyegah kekerasan dalem beberapa kesempetan. Bulan Agustus 2008, soldadu Abhasi ama Rus merangin soldadu Géorgi, nyang ngeja pemantèkan resmi Abhasi ama Ruslan, èn pengurungan mupakat gencetan senjata tahon 1994 serènta penyetopan misi PBB. Ari bulan 28 Agustus 2008, Parlemèn Géorgi ngumumin kalo Abhasi entu wilayah caplokan Ruslan, atu sikap nyang juga' banyak diambil ama banyak negara PBB.^[4]

1. ↑ Hopstat atawa hopstad (hurup Arab Gundul: هوفستت atawa هوفستاد) – ibukota (Indo.); capital (Ing.); hoofdstad (Wld.).
2. ↑ Olga Oliker, Thomas S. Szayna. (2003). Faultlines of Conflict in Central Asia and the South Caucasus: Implications for the U.S. Army. Rand Corporation. ISBN 978-0-8330-3260-7.
3. ↑ Rehèring (hurup Arab Gundul: رهيريڠ atawa رخيريڠ) – pemerintah, administrasi (Indo.); government, administration (Ing.); regering (Wld.).
4. ↑ "Территориальная целостность Грузии опирается на твердую международную поддержку". golos-ameriki.ru. Diarsip deri nyang asli per 19 Sèptèmber 2018. Dipungut 23 Juli 2023.

Kategori:Èropa Kategori:Kaukasus Kategori:Negara