Ursula von der Leyen

L’Ursula Gertrud von der Leyen (Ixelles, 8 'd Utóbar dal 1958, a s lèś [ˈʊʁzula fɔn dəɐ̯ ˈlaɪən] in tedésc, scólta'l chè) l'è na pulìtica tedésca dla CDU, presidènta dla Cumisiòṅ européa da 'l 1 ad Dicémbar dal 2019 a 'l pòst ad Jean-Claude Juncker.

La gh'à sèt fiōi abû tut fra 'l 1987 e 'l 1999.

Fiōla 'd Ernst Albrecht, èx minìstar-presidènt dla Sasògna Basa, l’Ursula la crés in dal Bélgi, al stat in du l'è nada. Chè l'impàra bèṅ al francéś e la stùddia archeulugìa prima 'd interesàr-'s a l'ecunumìa in Germàgna a Gotìinga e a Münster e 'd laureàr-'s in madśìna a Hannover.

In séguit la tîṅ adrē a sò marè mèdag, ch'al gh'à dâ 'l cugnóm da nòbil, andànd a star sèg par quàt'r an in Califòrgna par lavōr.

In di an Dumìla la taca a 'vēr di incàr'g impurtànt in pulìtica tant ch'la canseléra Angela Merkel la la sarnìs in dal 2005 par far-ag far la minìstra dla famìja. In séguit la pasa prima a 'l ministēr dal lavōr e di afâr suciài e pò a la diféśa, prima dóna a far-al.

Al 2 ad Luj dal 2019 al Cunsìli européo al l'elèś presidènta dla Cumisiòṅ européa cun 383 vōt a favōr (da la sò banda anc i parlamentàr itagliàṅ dal PD, ad Fòrsa Itàglia e dal Muimènt Sinc Stéli), 327 cuntràri, 22 astenû e na schéda minga vàlida.

In dal sò mandâ la s è catàda adòs dū prubléma dimóndi ingatiâ da risòlvar: la Brexit e l'emergénsa COVID-19 in du l'à mis a dispuśisiòṅ al fónd SURE par pagàr la diśucupasiòṅ e la casa integrasiòṅ di lavuradōr e 'n fónd destinâ a i stat mémbar ciamâ Next Generation EU da 750 migliàrd 'd euro, divìś a 'l incìrca mèś e mèś fra finansiamènt in prèst e a fónd pardû.

• (DE) Al sò sit sit ufisiàŀ