Monte Porreiro, Mourente, Pontevedra

Monte Porreiro
Entrada a Monte Porreiro
Parroquia	Mourente
Concello	Pontevedra
Coordenadas	42°26′47″N 8°37′25″O / 42.44638889, -8.62361111
Poboación	8.000 hab. (2022)
[ editar datos en Wikidata ]

Monte Porreiro é un lugar da parroquia de Mourente e un barrio residencial da cidade de Pontevedra. É a sede da Universidade Nacional de Educación a Distancia na provincia de Pontevedra. O barrio conta cun centro de saúde, un colexio e un instituto e unha igrexa parroquial desde finais do século XX, sendo o seu patrón o Bo Pastor. Tamén hai zonas verdes, entre as que destaca o Parque do Miradoiro.

Monte Porreiro é un barrio situado no nordés da cidade. Limita ao norte e ao oeste co río Lérez, ao leste co lugar de Mourente e ao sur co barrio da Seca.

O nome de Monte Porreiro ten a súa orixe nas pendentes do terreo do lugar. Porreiro ven de porro-porrera que significa costas abundantes e o nome do barrio de Monte Porreiro refírese a un "monte con costas abundantes".^[1]

A principios do século XX, en 1900, Casimiro Gómez, un adiñeirado terratenente, comprou en Monte Porreiro unha propiedade de 70 hectáreas, antiga leira de San Antonio Abad, á que chamou Villa Buenos Aires.^[2] Chamouna así pola súa estreita relación coa Arxentina, onde fixera fortuna.^[3] Converteuna nunha fermosa e rica explotación agropecuaria onde pasaba as súas vacacións. Cultivaba viñedos e froiteiras, reservando unha grande extensión de terreo para a cría de gando. Os produtos da leira recibiron importantes premios nas diferentes exposicións ás que concorreron.

Para rendibilizar ao máximo a riqueza dos mananciais mineromedicinais do contorno da leira, levou a cabo un proxecto de creación dun balneario.^[4] A alta sociedade pontevedresa de principios do século XX asistiu á inauguración das Termas do Lérez o 22 de agosto de 1906.^[5] O establecemento hostaleiro e termal creado en 1906 por Casimiro Gómez foi punto de encontro de influentes políticos, aristócratas e membros da realeza da época, que aproveitaban as augas medicinais (augas dos mananciais de Monte Porreiro e Aceñas) e os camiños que rodeaban esta leira hoxe desaparecida. Casimiro Gómez comercializaba as augas minerais baixo a marca Augas Lérez en botellas para consumo doméstico que se vendían en países como Estados Unidos, Inglaterra, Exipto, India e Australia. En 1907, a marca recibiu varios premios e o propio rei Afonso XIII felicitou a Casimiro Gómez pola súa gran calidade. Ese mesmo ano concedéuselle o título de provedor da Casa Real española.^[6] A infanta Elena, que visitou o balneario en 1914, o marqués de Riestra, Eugenio Montero Ríos, Cobián Roffignac e o ministro José Canalejas, entre outros, foron visitantes ilustres do balneario.^[7]

Cando estalou a primeira guerra mundial, Casimiro Gómez regresou a Arxentina para converterse en provedor dos países participantes na Gran Guerra. Regresou a Monte Porreiro ao termo da primeira guerra mundial, pero a moda dos balnearios pasara e a actividade da leira reorientouse cara a unha granxa experimental.^[8] Na súa propiedade construíu un dos primeiros campos de tenis de Galicia.^[9]

O barrio de Monte Porreiro foi desenvolvido con base nun Plano Parcial derivado do Plano Xeral de 1968, no cal a antiga gran propiedade Buenos Aires foi incluída como solo de reserva residencial. En 1969 presentouse unha maqueta do que entón se denominaba a xigantesca urbanización de Monte Porreiro, na que se proxectaban máis de 2.000 vivendas de distintos tipos nunha superficie de 68 hectáreas. Na década de 1970 comezou a ordenación e o desenvolvemento urbanístico de Monte Porreiro, coa construción de varios chalés na rúa Reino Unido, ós que seguiron modernas torres ladeira arriba .^[10]

En 1973 inaugurouse en Pontevedra a sede do Centro Rexional da Universidade Nacional de Educación a Distancia, que en 1987 trasladouse ao barrio.^[11]

En 20 anos os campos de cultivos e pastos convertéronse nun barrio dormitorio moi preto do núcleo urbano, construíndose unha gran parte dos edificios do barrio nos anos 80. En novembro de 1988 inaugurouse no barrio o IES Luís Seoane.^[12]

En novembro de 1995, publicouse o anuncio para a construción do centro de saúde de Monte Porreiro, inaugurado en 1997.^[13]

A igrexa parroquial católica do Bo Pastor inaugurouna Julián Barrio, arcebispo de Santiago de Compostela, o 9 de outubro de 2010. A súa planta ten forma de cuncha de vieira.^[14]

En 2011 inaugurouse a nova ponte sobre o río Lérez, a ponte da Palabra, que une o barrio coa parroquia de Lérez e o mosteiro de San Salvador de Lérez.^[15]

Desde 2020, o parque da praza de Europa conta cunha tirolesa de 20 metros de lonxitude.^[16] En maio de 2020 o concello de Pontevedra creou un Metrominuto para o barrio.^[17]

Monte Porreiro é un barrio da periferia de Pontevedra, situado ao nordés do centro da cidade. Esténdese ao longo do río Lérez. As rúas do barrio levan nomes de países europeos: Francia, Suecia, Dinamarca, Países Baixos, Reino Unido, Portugal, Luxemburgo, Irlanda, Alemaña, Bélxica e Grecia. A praza central é a praza de Europa.

Ao oeste do barrio atópase o Parque do Miradoiro e ao leste o Parque da UNED, que formaban parte da vila "Buenos Aires", cuxo propietario era Casimiro Gómez.^[18]

Moi preto do barrio, río abaixo, atópase a praia do Lérez.

A sede do Centro Asociado da UNED de Pontevedra (creado en 1973) atópase no barrio desde 1987. Entre os centros educativos destacan o IES Luís Seoane, o Colexio Marcos Portela, a Escola Infantil Fina Casalderrey e a Gardería A Galiña Azul.

Tamén hai un centro de saúde e unha igrexa parroquial, e as instalacións deportivas inclúen un campo de fútbol e rugby.

Preto do barrio atópase o apeadoiro de Pontevedra-Universidade.

As festas do barrio teñen lugar todos os anos ao redor dos días 4 e 5 de maio e dedícanse ao santo patrón de Monte Porreiro, o Bo Pastor.^[19][20][21]

• 
  Parque do Miradoiro
• 
  Parque do Miradoiro
• 
  Igrexa do Bo Pastor
• 
  Lateral da igrexa
• 
  Río Lérez
• 
  Sede do Centro Asociado da UNED de Pontevedra
• 
  Pista de xincana
• 
  Pérgola desde o interior do miradoiro
• 
  Ponte da Palabra
• 
  Ponte da Palabra
• 
  Vista xeral do interior da igrexa parroquial
• 
  Bancos xunto ao miradoiro

Wikimedia Commons ten máis contidos multimedia na categoría:  Monte Porreiro, Mourente, Pontevedra

• Mateo Sanz, Gonzalo (2020). "La naturaleza en la toponimia española VII". Flora Montibérica (Valencia: FloraMontiberica.org) (77): 3–12. ISSN 1138-5952. 

• Parque do Miradoiro
• Centro Asociado da UNED de Pontevedra
• Campo Municipal de Monte Porreiro
• Ponte da Palabra
• Río Lérez

• Centro de saúde de Monte Porreiro
• Proxecto de reurbanización do barrio de Monte Porreiro
• Asociación El Mirador