Li Wenliang
Li Wenliang (in chinese: 李文亮; Beizhen, China le 12 de octobre 1986 – Wuhan, China le 7 de februario 2020) esseva un ophthalmologo chinese qui advertiva su collegas super le prime infectiones de COVID-19 in Wuhan. Le 30 de decembre 2019, le Centro de Controlo e Prevention de Maladias de Wuhan emitteva advertimentos de urgentia a hospitales local super un numero de casos de "pneumonia" mysteriose discoperite in le citate in le septimana precedente. Le mesme die, Li, qui laborava al Hospital Central de Wuhan, recipeva un reporto diagnostic interne de un patiente suspectate del syndrome respiratori acute sever (SRAS). Ille compartiva le reporto con su cameradas del Universitate de Wuhan per un gruppo de WeChat. Ille esseva denominate un insufflator de sibilo quando le reporto compartite postea circulava publicamente, quamquam ille rogava a su gruppo de cameradas in WeChat que illes non divulgarea le message foras del gruppo excepte pro "advertir lor membros de familia e personas amate", e Li non pareva haber intention de advertir le public. Rumores del eruption de SRAS subsequentemente se diffundeva in platteformas de media social chinese; le policia de Wuhan convocava e admoneva le e septe altere medicos le 3 de januario pro "facer commentarios false in le Internet super un eruption de SRAS non confirmate."
Le eruption esseva confirmate postea non como SRAS, sed como un nove coronavirus, SRAS-CoV-2. Li retornava a laborar e plus tarde contraheva COVID-19, le maladia causate per le virus ab un patiente qui non esseva cognoscite como infectate. Ille moriva del maladia le 7 de februario 2020, al etate de 33 annos. Un inquesta official subsequente le exonerava; le policia de Wuhan formalmente faceva excusas a su familia e revocava su admonition le 19 de martio. In april 2020, Li esseva postumemente premiate con le Medalia del Quatro de Maio per le governamento. Al initio de junio 2020, cinque altere medicos del hospital de Wuhan habeva morite de COVID-19.
