Worms

Worms es una seria de juecs vidèos, començada bèu premier sus leis ordinators Amiga e que puei s'espandiguèt dins quasi totei lei maquinas comercializadas despuei 1995.

Au començament de Worms, l'es un jovenet, Andy Davidson, que prepausèt en 1995 a l'editor Team17 una evolucion dau classic Artillery qu'aviá programat solet sus son Amiga, remplaçant lei tanks per de vèrmes e l'apondent una influéncia que ramentava lei Monty Pythons. Estrambordat per sa presentacion, Team17, qu'èra au mitan deis annadas 1990 lo leader de publicacion de juec sus Amiga, li faguèt sinhar un contracte per desvelopar son concèpte e ne far d'adaptacions sus totei lei platafòrmas ludicas qu'existissián a n'aqueu temps, qu'èran segur de tenir aquí lo novèu Lemmings. Après d'una sortida sus un Amiga morrissent, Worms venguèt tocar leis maquinas de juecs : SNES, 3DO, CD32, Jaguar, GameBoy, Mega Drive, PlayStation, Saturn, e, segur, IBM PC.

Talament fuguèt un succès lo juec qu'a l'ora d'ara Team17 es quasi consagrat en entier au desvolopament de la licéncia que conoissèt de nombrosei seguidas.